KUGXEKWA UMNYANGO NGOKUBHUBHUDLA EYABAKHOKHINTELA
UGXEKIWE uMnyango wezemiSebenzi yomPhakathi ngokuhlongoza ukusebenzisa izigidi zamarandi ukunakekela izindlu zongqongqoshe emuva kokuveza kwawo ukuthi uzosebenzisa u-R730 million ukuzilungisa.
Iphephandaba langeSonto, iSunday Times, libike ukuthi lesi samba sizoqondana nokwenziwa ngcono kwamahhovisi ongqongqoshe ephalamende, eCape Town, kanti u-R5 million uzosetshenziswa ukuthenga okhaphethi basenhlokohhovisi, i-Union Buildings, ePretoria.
Libike ukuthi uNgqongqoshe wezemiSebenzi yomPhakathi, uMnu Thembelani “Thulas” Nxesi ( osesithombeni), uveze ukuthi u-R1 million uzose-tshenziswa ekulungiseni igumbi lokugezela nekhishi endlini kangqongqoshe ngamunye kanti u-R29 million uhlinzekelwe indlu kanogada, kuthi omunye u-R29 million uqondane namasango nendlu yezinja.
UMnu Nxesi usho yonke le mininingwane ngempendulo ebhaliwe yombuzo wasePhalamende ngoLwesihlanu.
Enye indlu kangqongqoshe ngamunye, kulindeleke ukuba ifakelwe indlu kanogada entsha, ucingo lokubiya namakhamera ezokuphepha - sekukonke okuzodla R4,3 million.
Ngasekuqaleni kwalo nyaka uMnyango wezeMisebenzi yomPhakathi, ubikele iphalamende ukuthi kusetshenziswe u-R45 million ngokunakekelwa kwezindlu zongqongqoshe eCape Town nasePretoria ngonyaka-mali ka-2017/2018 kuphela.
Wona lo mnyango igama lawo libe sezindabeni ngonyaka odlule emuva kokuba kuvele ukuthi usebenzise u-R500 000 ngezindawo zokuzithokozisa nokosa ezindlini ezine zongqongqoshe, nokunye okubonakala kungenasidingo - kusetshenziswa imali yabakhokhintela.
Umnyango kaMnu Nxesi ubikele ikomidi eliqondene nezemali yomphakathi (iScopa) ngoNcwaba (August) ngonyaka odlule ukuthi kunezindlu eziwu148 ezibizwa ngokuthi ezekhethelo, ezihlalisa ongqongqoshe. Kwavela nokuthi eziwu-67 kuzona ziseCape Town, eziwu-80 zisePretoria eyodwa iseThekwini.