BAFUNA ISINXEPHEZELO KUMNIKAZI WEBHILIDI ABASHELWE IMPAHLA
BAKHIHLA esikaNandi osomabhizinisi abahweba edolobheni laKwaNongoma elishe langqongqa nempahla yabo mhla ka-27 kuNdasa (March), kanti bathi bafuna ubulungiswa, umnikazi webhilidi abanxephezele ngalo monakalo.
Lo mlilo ongaziwa, uqubuke kuleli bhilidi elisenkabeni yedolobha eliphethwe nguMnu Tehius Strydom, kwasha impahla okubalwa kuyona izinto zokuthunga, ukudla okudayisayo ngisho nama-internet cafe imbala.
Osomabhizinisi bathi bazamile ukuwucima lo mlilo obusha ubuhanguhangu kodwa bahluleka bancama. UMnu Musa Buthelezi obene-internet café kuleli bhilidi, enza nomsebenzi wokushutha imishado, aqophe namavideo, ekhuluma neLANGA uthe:
“Ngilimele kakhulu ngokusha kwaleli bhilidi, kumanje kangazi ngizothini emakhasimendeni ami, ngishelwe izinto zami zokusebenza ezingadla imali ewuR35 000.
“Siyile sayovula icala ukuze umnikazi webhilidi asinxephezele, wasitshela ukuthi kumele sikhokhe imali yerenti (kaNdasa) yize sishelwe yizinto zethu ebhilidini lakhe. Usikhiphile wathi masiphume siphele uma sinqaba ukuyikhokha.”
Ethintwa yiLANGA uMnu Strydom, uthe kuliqiniso ukuthi kunebhilidi elishile edolobheni KwaNongoma.
“Umonakalo owenzekile kangiwazi ukuthi ungabiza imali engakanani, kepha ngiyazi ukuthi amaphoyisa afikile azibonela okwenzekile. Uma kukhona abantu ababeqashile ukudayisela kulo, kunezikhalo abanazo bangaluthatha udaba baludlulisele phambili. Ibhilidi liyaqhubeka nokusebenza,” kusho uMnu Strydom.
U-Adv Vusimuzi Sibiya oyingcwepheshi kwezamacala afana naleli, oke waba ngummeli isikhathi eside oNdini, uthe abamangali kuzomele bathole umuntu owuchwepheshe, ozoqinisekisa ukuthi lo mlilo udalwe yini.
“Uma kuwukuthi kungenxa yobudedengu bomnikazi webhilidi, umthetho usungamenza ukuba anxephezele abathintekile kulesi sigameko.
“Kuningi okungadala umlilo, kungaba wubudedengu bokunganakwa kwebhilidi nokungalungiswa ngendlela noma ukunganakwa kwezintambo wumasipala noma izimo nje zemvelo.
“Kuzofanele laba abavula icala babe nento ephathekayo ngoba kwabona bangazithola sebekhokha izindleko zecala,” kusho u-Adv Sibiya.
Okhulumela amaphoyisa KwaZulu-Natal, uCapt uNqobile Gwala, ukuqinisekisile ukuvulwa kwecala lokusha kwebhilidi.
“Amaphoyisa aKwaNongoma ayaqhubeka nokuphenya icala lokusha kwebhilidi okwenzeke mhla ka-27 kuNdasa 2019. Namanje imbangela yokusha kwalo ibingakaziwa,” kusho uCapt Gwala.
Usikhiphile wathi masiphume siphele uma sinqaba ukuyikhokha...