Ubanjiswe yimihuzuko zamkhalela umsolwa
Utshele umndeni namaphoyisa ukuthi uthole isidumbu emgwaqweni
ULAHLWE ngelakubo owesilisa osolwa ngokudlwengula abulale owesifazane waseCato Manor, eThekwini, isidumbu sakhe wasibeka ngaphandle kwesango lesonto, emuva kwalokho wayobikela umndeni kamufi namaphoyisa ukuthi uthole isidumbu emgwaqweni.
Isidumbu sikaNkz Zamacenge Mngoma (33) ( osesithombeni), sitholwe ngoLwesine ekuseni. Kusolwa lona wesilisa obengaphandle ngoshwele - esiza ngokwenza imisebenzi yomphakathi aze aphothule isigwebo sakhe - ukuthi nguyena ombulele.
ILANGA lithole ukuthi isidumbu sikaNkz Mngoma sitholakale ngoLwesine ekuseni sinezibazi zokushaywa, singagqokile ngenzansi, okusolakala ukuthi umufi uqale wadlwengulwa ngaphambi kokubulawa.
UNkk Belinda Khuzwayo, uMaMngoma, ongudadewabo kamufi, uthi ingane yakwabo inyamalale ngoLwesithathu ntambama, ibiphume kubo
kukhona umuntu ebixoxa naye emgwaqweni, yangabe isabuya.
Uthi ngoLwesine ekuseni, umndeni wakhe uvuswe ngumsolwa ewutshela ukuthi kunesidumbu sowesifazane asithole sidindilize emgwaqweni eduze kwesonto, usola sengathi yindodakazi yawo.
Utshele ILANGA ukuthi umsolwa udlulele esiteshini samaphoyisa eyowabikela ngesidumbu lesi.
Uthi umsolwa akabange esaphuma esiteshini samaphoyisa, kwazise abeseqaphele ukuthi unemihuzuko emzimbeni, ebibonakala ukuthi isemisha.
Ngokusho kukaNkk Khuzwayo, amhlome ngemibuzo, wankwankwaza, zamkhalela. Ugcine ephume namaphoyisa eseyowakhombisa lapho asishiye khona isidumbu.
Uthi umsolwa ubenezinyanga ezimbili efikile endaweni yabo njengoba bethole ukuthi ubecelelwe ukuhlala esihlotsheni sakhe, ephume ngoshwele ejele. Ubehleli kulesi sihlobo nje, ubesiza ngokwenza imisebenzi yomphakathi ukuqedela isigwebo sakhe. UNkk Khuzwayo uchaze udadewabo njengentokazi ebinamandla, ebikwazi ukuzibambela impi, yingakho nomsolwa ebanjiswe yizibazi asola ukuthi uzithole beshudulisana.
“Sibuhlungu ngendlela abulawe ngayo udadewethu. Umsolwa uqede ukumbulala wathatha nomakhalekhukhwini wakhe. Sithole ukuthi amaphoyisa awuthole endlini yakhe,” kusho uNkk Khuzwayo.
Okhulumela amaphoyisa KwaZulu-Natal, uCapt Nqobile Gwala, uthe amaphoyisa abophe umsolwa oyedwa ngemuva kokutholakala kwesidumbu sowesifazane sinezimpawu zokudlwengulwa.
Uthi kuvulwe amacala amabili, elokubulala nelokudlwengula, umsolwa uzovela eNkantolo yeMantshi eThekwini, namuhla ngoMsombuluko.
Umakhalekhukhwini kamufi utholwe endlini kamsolwa.