Othisha bafakane iqupha esikoleni
Bobabili bakhalelwe ngamasongo kaS'gonyela
KUBATSHAZWA ihlazo lothisha ababili baseBuhlebethu Primary School, eNewtown C, eNanda, eThekwini, okubikwa ukuthi bahluthane ngequpha phambi kozakwabo emuva kokuqubuka kwengxabano ngoLwesihlanu ekuseni.
Kubikwa ukuthi simuncu isimo kulesi sikole, emuva kwalesi sigameko esenzeke phakathi kwalabo thisha abangeke badalulwe amagama baze bavele enkantolo, njengoba bobabili bekhalelwe ngamasongo kaS’gonyela emuva kokuvulelana amacala okushaya ngenhloso yokulimaza.
Yize kungacaci ukuthi yini ebibangwa, kodwa ILANGA lihabule ukuthi indaba isuswe wumhlangano obuzoba kwelinye lamahhovisi, okuvele ukuthi ubizwe nguthisha (othintekayo kulokhu kulwa) lingaziswanga ibamba likathishanhloko.
Kuthiwa kube wongaphansi nongaphezulu phakathi kwalo thisha nebamba likathishanhloko.
Ethintwa omunye walabo thisha, uthe ucela ukungaphawuli ngalolu daba.
Okhulumela amaphoyisa KwaZuluNatal, uCapt Nqobile Gwala, uthe akhona amacala amabili avuliwe okushaya ngenhloso yokulimaza, abasolwa badedelwe ngesexwayiso.
Kulindeleke ukuba bavele eNkantolo yeMantshi yaseNtuzuma namuhla ngoMsombuluko.
Okhulumela uMnyango wezeMfundo KwaZulu-Natal, uMnu Muzi Mahlambi, uthe kuyihlazo futhi kuyadumaza ukuthi abantu okulindeleke ukuba babe yisibonelo ezinganeni, batholakale bethinteka entweni efana nalena.
“Ngisho ngabe bekukhona okubaxabanisile, kodwa ikhona indlela yokuxazulula izinto ngaphandle kokuba kulwiwe. Yize besingakezwa ngalolu daba, kodwa sizolulandela, kwenziwe nophenyo ukuze kuzovela ukuthi yini umsusa wendaba, kuthathwe nezinyathelo ezifanele,” kusho uMnu Mahlambi.