Bamncome ngamagalelo akhe uProfessor
UTUSWE ngozakwabo uProfessor egubha usuku lwakhe lokuzalwa endaweni ejuxuza omtakabani KwaMashu, i-Artizen. Iningi lamaciko abenandisa belifike lincome lo mculi njengeqhawe eselidlale indima ende ezimpilweni zawo. Kuqale i-Avante esayine ngaphansi kwenkampani yakhe, iProper Files, yabonga uProfessor, yathi uhlale ekhona empilweni yabo ngisho nangezikhathi ezinzima. Ngemuva kwayo kungene iMalini nayo ededele ingoma abantu yabashiya becela impinda. Ivule ngengoma yayo eyashisa izikhotha esihloko sithi: “Balele” ngemuva kwalokho yaqhulula inqwaba yamanoni, abantu beme ngezinyawo becula kanye nayo. Kuqede iMalini kwangena inqwaba yamaciko ashisa izikhotha, elandelana. Phakathi kwawo kubalwa uDladla Mshunqisi, uSjava, uBabes Wodumo, uMampintsha, uZakwe, uBeast noSjerere. Wonke lamaciko abengaqedi ukunandisa engamncomanga uProfessor. USjava uthe yena ubukela kuProfessor ngoba akakaze ezwe kuthiwa ushaye umuntu futhi akaze etholakale ngezindaba ezimbi kwabezindaba. Amalungu omphakathi abehambele lomcimbi abebulala inyoka ungafunga ukuthi iholide. Khonamanjalo uCharacter, ongumfowabo kaProfessor, uthule ingoma yakhe esihloko sithi, “Inde le ndlela”. Abantu batshengise ukuyithakasela njengoba eze wayiphinda kabili. Kuze kwasa abantu bejuxuza bengazimisele ngokugoduka.