BAKHELWE UMTAPO WOLWAZI OSEZINGENI
KUQHILIKE izihlathi kwabakhubazekile nasentsheni eyakhele uMasipala iRay Nkonyeni, ePort Shepstone, kuvulwa ngokusemthethweni umtapo wolwazi ( library), onobuchwepheshe obusezingeni eliphezulu ngoLwesine olwedlule.
Lo mtapo wolwazi oyibhilidi elinezitezi ezintathu - okuthiwa udle u-R77.6 million - unendawo ehlinzeka abakhubazekile, enekhompyutha enezwi uma bedinga ukusesha okuthile. Kunane-CD umuntu akwazi ukuyilalela, imnikeze uhlu lwezincwadi ezikhona kulo mtapo, ikufundele leyo ncwadi uma usuyibeke phezu komshini.
Kawugcini ngalokho njengoba kunendawo enobuxhakaxhaka bobuchwepheshe bamakhompyutha lapho abafundi abakwazi ukwenza khona umsebenzi wabo wesikole, baseshe kwi- internet.
Kwamanye amagumbi angaphansi, kunendawo engasetshenziswa ngabantwana abanezinyanga eziwu21 ubudala kuya phezulu, badlale imidlalo efana ne- puzzle.
Kunelinye igumbi elingasetshenziswa ngabaneminyaka esukela ku-14 ubudala, lokudlala imidlalo besebenzisa umabonakude.
UNkz Silindile Gumede, waseGamalakhe, khona ePort Shepstone, uthi ukwakhiwa kwalo mtapo kubasize kakhulu njengoba bekudingeka ukuba bakhokhe u-R15 ihora uma befuna ukusebenzisa i- internet emainternet cafe.
“Bekuba nzima kakhulu uma ufuna ukufaka isicelo somsebenzi ngoba bekufanele ufake nezicucu zakho, obekuthatha cishe ihora lonke uma zizine kuya phezulu kwazise zingena kancane kula makhompyutha akhokhelwayo ngoba basuke befuna ukwenza inzuzo.
"Uma ufuna ukufaka isicelo sokufunda e-Unisa, bekudingeka ube no-R100-00 kuya phezulu.
"Sibonga kasiphezi kumasipala wethu ngokusakhela umtapo wolwazi osezingeni eliphezulu kangaka,” kusho uNkz Gumede.
UNkz Anelisiwe Cele, ongumfundi ePort Shepstone High School, uthi sekuzoba lula ukuthola izincwadi abasuke bezidinga njengoba kulo mtapo kukhona lonke uhlobo lwencwadi.
“Kulo mtapo wolwazi ebesiwusebenzisa phambilini, ubuke uthi uyafika, utshelwe ukuthi incwadi ethile iphumile, ungazi noma bebeba nencwadi eyodwa yini,” kusho yena.
IMeya yalo Masipala, uNkz Cynthia Mqwebu, ithe ukwakhiwa kwalo mtapo wolwazi kakugcinanga ngokufeza iphupho labantu bakule ndawo lokuba nomtapo wolwazi esezingeni eliphezulu, kodwa kudale namathuba emisebenzi kubantu bakule ndawo.
“Ngikhuluma nje, sekuqashwe izisebenzi eziwu-13 ezizobhekelela ukusebenza kwalo mtapo. Sizophinde siphume inqina lapho sizohamba sifundisa ngekhompyutha abantu abakhele lo masipala, ukuze bathole izitifiketi abangaqashwa ngazo kwezinye izinkampani noma babuye bazosebenza la, basize asebekhulile kodwa abanothando lokwazi ukusebenzisa ikhompyutha.
"Umtapo siwakhe waba seduze nerenki ukwenzela nalabo abahamba ngezinto zomphakathi ukuba bangahambi ibanga elide sebefikile edolobheni ukufinyelela kuwona,” kusho uNkz Mqwebu.
UNgqongqoshe wezobuCiko namaSiko KwaZulu-Natal, uNkk Bongi Sithole-Moloi, uthe: “Besifisa ukuba lo mtapo siwuvule kanye nowaseThekwini kodwa kwangenzeka ngenxa yezinkinga ezibe khona. Sivula lo mtapo wolwazi nje, ngeledlule besivula omunye ngaphansi kukaMasipala waseMdoni.”