SAZE SAHLUKUMEZEKA KWAMNYANDU
MHLELI: Ngidumele futhi ngiphoxekile ngento eyenziwe yisisebenzi sasenxanxatheleni yezitolo KwaMnyandu, eMlazi, ngoMgqibelo.
Besiphelezela omunye umhlobo wethu eyofihla isihlobo sakhe eNgonyameni, sisuka eLamontville yena nabanye besuka KwaNdengezi. Sihlele ukuba sihlangane kule nxanxathela yezitolo ukuze phela sicoshacoshe esizovela ngakho lapho besiya khona.
Umhlobo wethu ebesihamba naye, uphila nokukhubazeka, walimala emlenzeni eminyakeni edlule. Ufike wapaka endaweni yabanokukhubazeka, sashiya imoto siyobingelelana nalezi zinsizwa ebesihambisana nazo sizohlela nokuthi siyofika kanjani lapho siya khona ngoba thina besingakwazi.
Akuphelanga mizuzu mingaki, kwaqhamuka enye imoto, umshayeli wayo wasitshela ukuthi imoto yalo mbhemu esihamba naye isifaswe amasondo ngoba kuthiwa ipake endaweni engafanele.
Siphuthumile sayobheka, nempela safica ifasiwe. Le nsizwa nezinye izinsizwa bahambile beyochaza ukuthi umshayeli unokukhubazeka - futhi uyazibonakalela nje akadingi kuchazwa - owesifazane esitshelwe ukuthi nguyena oshaya amaphiko kule ndawo okupakwa kuyona, ushaye phansi ngonyawo wathi lo mfowethu ngeke ayinuke imoto engawukhiphanga u-R500 futhi uma eyishiya, imali izala u-R250 ngosuku.
Kuzanywe kwazanywa kodwa lutho. Bese kuwusizi lo mfowethu ehamba exhugela, ehla enyuka kuhlanganiswa lo R500, kwazise phela imali ibisisebenzile. Ukuba le mali ibingekho kusho ukuthi lo mfowethu ubezoxhugela ayofuna amatekisi abheke eLamontville futhi abuye exhugela kanjalo esehlanganise eyokukhipha imoto?
Kusho ukuthi kwamngcwabo lowo ubengeke esawubona! Le ntokazi ithe kuyomele abuyele eMlazi namuhla ngoMsombuluko ayofaka isikhalo ukuze abuyelwe yimali yakhe.
Siyazi futhi siyaqonda ukuthi indawo nendawo inemithetho nemigomo yayo kodwa iqiniso elingephikwe wukuthi imithetho kayibekelwe ukuba kuhlukunyezwe abantu ngayo nokuba abasemandleni bakhombise ubukhulu babo phezu kwabanye abantu ngayo. Abantu abakhubazekile pho!
Yebo, bekubhaliwe ukuthi imoto engavumelekile ukupaka kule ndawo izofaswa, umnikazi wayo ayikhiphe ngo-R500 kodwa akukho okucacisayo ukuthi imoto kumele ibe nestikha esikhombisayo ukuthi umshayeli ukhubazekile, kumele kubonakale isihlalo esinamasondo noma izinduku zokudondozela. Lo muntu engikhuluma ngaye kunzima ngisho ukugibela nokwehla emotweni, okuyikho okwenze wangapaka ezikhaleni ezijwayelekile ngoba kwazona zithanda ukuba zincane kakhulu kokujwayelekile.
Ngokwami lona wesifazane ukhombise unya olwesabekayo ngento engathi shu. Le nto isihlukumeze sonke kangangoba kwankonzo yomngcwabo sifike isizophuma. Uwonile umoya wethu lo sisi, siyambonga. Sethembe ukuthi kuyoba mnandi mhla kwenzeka kuyena lokhu futhi nalo msebenzi wakhe uyohlale enawo.