Ukuphindile uJenet kowaseNquthu
UPHINDE wavelela uJenet Mbhele waseMzimkhulu edla umhlanganiso kwiNquthu Half Marathon izolo ngeSonto ebihambisana ne10km eqale ekhoneni lo mgwaqo obheke eRorkes Drift yasongwa ehholo lo mphakathi lakuyo le ndawo eNtombenhle.
Lo msubathi obe yingqwele yalo mjaho nyakenye uyi-10km, wenze isikhathi esingu-1:20 evule igebe lika-400m kuNobuhle Tshumo, kwathi uMathakase Lesti walala isithathu.
Ingqwele kwabesilisa kube nguAnele Dlamini waseHammarsdale edla ubhedu ngesikhathi esingu-1:08:14 emiswe kabi nguNtsindiso Mphakathi ngo-1:08:32 kwathi uThabang Mosiako wangena isithathu.
Ekhuluma nabezindaba ngemuva komjaho, uJenet uthe ujabule kakhulu ngokunqoba futhi uzimisele ukubuya ezovikela isicoco sakhe ngonyaka ozayo.
“Umjaho wanonyaka ubunzima kakhulu unezintaba ezixakile kodwa ngiyajabula ukuthi ngikwazile ukuwunqoba. Owanyakanye ubungcono kakhulu kwazise bekuyi-10km. Umjaho usaqala benginovalo kwazise bekunabasubathi abaningi abahlonishwayo kwezokugijima ikakhulukazi abaphuma eLesotho.
“Umjaho ubuhleleke kahle namanzi abemaningi ngokwanele emzileni. Nonyaka ngizimisele ukugxila kakhulu emijahweni iSpar Women’s Challenge. Ngizimisele ukwenza kahle kuyo nonyaka njengoba ngingakwazanga ukuyigijima ngonyaka odlule,” kusho uJenet.
UDlamini ohambe phambili umjaho usuka uthe uze kulo mjaho evele efithi. Uthi ubenza ibanga lika-15km ngo-46:00 kanti uthi lokho kumsize kakhulu ngoba laba abehamba nabo bebezitshela ukuthi uzophela kanti ababuzanga elangeni.
Ngokunqoba kwakhe uJenet noDlamini bahlomule ngo-R10 000 ngokwehlukaana kwathi uSosibo noSibusiso Kubheka batholaR5000 ngokunqoba kwi-21km.
Lo mjaho ubuhlelwe nguMnya
ngo WezeMidlalo neNquthu Athletics Club. Ekhuluma nabezindaba uNgqongqoshe wezeMidlalo uBongi Sithole-Moloi, uthe umjaho ube muhle kakhulu kanti bazimisele ukuba bawukhulise ukuze banikezele labo abafuna ukubamba iqhaza kwiMarathon bakwazi kunokuba baye emadolobheni.
“Okunye esizimisele ukukwenza ukuba sishintshe igama lo mjaho kungabi yiNquthu ukuze wamukele bonke abantu. Sifuna lo mjaho ukuba ugijinywe phakathi kweNquthu neDundee njengoba kwenza iZululand District Marathon neHarry Gwala ekhipha imiklomelo yezimoto,” kusho uNgqongqoshe.
Imeya yaseNquthu uMabilabila Kunene uthe ubonga kakhulu kuNgqongqoshe ngokubalethela umjaho ofuze lona endaweni.
Uthi bazimisele ukuba ngonyaka ozayo baqinisekise ukuthi bakha imigwaqo ukuze nabahamba ngezihlalo bakwazi ukubamba iqhaza kulo mjaho. Uphethe ngokuthi nabo bazokuba nemiklomelo yabasubathi bendawo abenze kahle.
Isiyonke imiphumela yalo mjaho esigabeni esivulelekile kwabesilisa: 1.Anele Dlamini 1:08:14, 2. Ntsindiso Mphakathi 1:08:32, 3. Thabang Mosiako 1:08:40, 4. Slindile Gubese 1:09:08, 5.Sipho Mbanjwa 1:09:25, 6.Puseletio Mogokeng 1:09:27, 7.Bonginkosi Zwane 1:09:44, 8.Siphiwokuhle Dlamini 1:09:47, 9.Xolisa Tyali 1:10:08, 10.Makwande Mncwango 1:10:09.
Kwabesifazane: 1.Jenet Mbhele 1:20:00, 2.Nobuhle Tshumo 1:22:38, 3.Mathakase Lesti 1:23:23, 4. Nwabisa Mjoli 1:25:21, 5.Naliey Chirwa 1:26:40, 6.Dikeledi Masara 1:26:1:26:43, 7.Poppy Mlambo 1:28:18, 8.Diko Diko 1:29:12, 9. Adronica Mokgatha 1:31:40, 10. Nontobeko Luthuli 1:37:37
Eye.21km esigabeni esivulelekile kwabesilisa: 1.Sibusiso Kubheka 32:38, 2.Mbuleli Mathanga 33:17, 3. Ayanda Mncube 33:45, 4. Mthokozisi Mazibuko 34:20, 5.Sello Rebone 35:14.
Kwabesifazane: 1.Cacisile Sosibo 39:15, 2.Maline Mahloko 39:57, 3. Makasti Mokubutle 40:36, 4. Thobile Mkhize 41:36, 5.Thandi Sehlophe 41:42.