USHIYE ANGALAZI UMQEQESHI WE-SHARKS KUBADLALI

USHIYE angalazi kubadlali bakhe uRobert du Preez Snr ongumqeqeshi weCell C Sharks ezakhe zithelwa ngehlazo lika-5117 iJaguares yase-Argentina koweSuper Rugby ngoMgqibelo ntambama eJonsson Kings Park Stadium, eThekwini.

Ziye ekhefini iJaguares isihamba phambili ngo-21-10.

“Sizibulale thina kulo mdlalo. Angikaze ngiyibone into efana nalena selokhu ngafika kuleli qembu.

"Ungafike ushaye into ephezulu ngeledlule bese kwelizayo uzoshaya udaka, ibizwa ngokuthini into enjena? Angibazi abadlali bami ukuthi bebengenwe yini ngempela. Sidlale umbozo wodwa lapha futhi angikaze ngiwubone selokhu ngafika kuleli qembu. Ngisola ukuzithwala nokuzazisa kubadlali bami emuva kokuguqisa iLions ngeledlule. Bavele bazitshela ukuthi ngeke besathintwa muntu.

"Uma bezoqhubeka kanjena ngeke siye ndawo. Kulo mdlalo akekho noyedwa okhombise ukulwela iqembu. Sizozama ukulungisa isimo ngokushesha ukuze sikwazi ukuqhubekela phambili,” kusho uRobert Snr.

Isiyonke imiphumela yeSuper Rugby ngempelasonto ihambe kanje: Crusaders 43, Highlanders 17; Rebels 24, Stormers 41; Chiefs 33, Blues 29; Brumbies 31, Lions 20; Sharks 17,Jaguares 51; Bulls 32,Reds 17.

ISITHOMBE NGABE: BACKPAGEPIX UPHILIP van der Walt weSharks ebanjwa nguJulian Montoya weJaguars koweSuper Rugby onqotshwe yiJaguars ngo-51-17 ngoMgqibelo eJohnson Kings Park Stadium, eThekwini.