UBALISA NGOBUNZIMA ABHEKENE NABO UMICHO
UKHALA ngobunzima obubhekene nabadlali bakhe umqeqeshi we-Orlando Pirates uMilutin “Micho” Sredojevic.
IBucs iguqise ngo-2-1 iFree State Stars kowe-Absa Premiership ngoMgqibelo ebusuku e-Orlando Stadium, eSoweto.
Amagoli okunqobe ngawo iBucs abekwe enethini ngoMusa Nyatama obekuyiphenathi noJustin Shonga, kwathi eleFree State lona lashaywa ngu-Aleazar Rodgers.
Ukunqoba kulethe intokozo kubalandeli beBucs njengoba ivule igebe lamaphuzu angu-6 esicongweni selog.
Nokho iMamelodi Sundowns ebanga nayo isicoco seligi, isele ngemidlalo emithathu kwiBucs.
USredojevic uthi sinzima isimo esibhekene nabadlali bakhe.
“Lo mdlalo ngendlela esiwuqale kahle ngayo ngesiwombe sokuqala bekufanele sihlohle inqwaba yamagoli ngoba bebehleli emuva bengenzi lutho.
"Sibuye ngesesibili sabaphuthuma sashaya amabili ngokushesha.
"Sekusele imizuzu engu-15 umdlalo uphele, sidonse kanzima abadlali bethu bese bekhathele.
"Bakhathale kufanele, bathwele kanzima bo, ezinsukwini ezingu-7 sesigijime imidlalo emine singaphumuli.
"Ngijabule ngoba sigcine sinqobile savula igebe esicongweni lamaphuzu angu6.
"Anginandaba nokuthi izimbangi zethu zisele ngemidlalo, okumqoka kithina wukuthi sinqobe imidlalo yethu ngoba le abangakayidlali akuqinisekisiwe ukuthi bazoyinqoba,” kusho uSredojevic.
UNikola Kavazovic ololonga iFree State uthi bahlulwe yiqembu eliseqophelweni eliphezulu.
“Besibayeke ngamabomu ukuthi basicindezele ngoba besazi ukuthi bazokhathala.
"Iphutha esilenzile wukubavumela bahlohle amagoli ngokushesha ngesiwombe sesibili.
"Sihlulwe kufanele banabadlali abaseqophelweni eliphezulu kunabethu ngoba bayikilabhu enkulu.
"Kodwa-ke akuphelile ngathi sisazolwa,” kusho uKavazovic.
IFree State kuzokuthi ngoLwesithathu ngo-19h30 ibhekane neHighlands Park koweligi eMakhulong Stadium, eTembisa.
UKavazovic uthi bazozama ngawo wonke amandla ukuwunqoba lo mdlalo.
“Yiwona mdlalo okufanele siwunqobe lona ukuze sigudluke kule ndawo embi esihleli kuyona. Ngeke kube lula kodwa sizolwa,” kusho uKavazovic.