Ujabule wabuya nganeno uPitso
IDowns izobhekana neCasablanca kwi-semi final
UJABULE wabuyela nganeno umqeqeshi weMamelodi Sundowns njengoba ezakhe zizalelwe yinja endlini kwazise zizobhekana neqembu eliyizimbangi zawo ezinkulu kwi- semi final yeCaf Champions League.
IDowns iguqiswe ngo-1-0 yi-Al Ahly yase-Egypt emlenzeni wesibili we- quarter final yeChampions League ngoMgqibelo kusihlwa khona e-Egypt.
Kube ngu-5-1 sekuhlanganiswe yomibili imilenze okwenze iDowns yadlulela kwi- semi final.
Nokho kubukeka izalelwe yinja endlini njengoba izobhekana neWydad Casablanca yaseMorocco kwi- semi final emuva kokuba inenebule ngo-5-0 iHoroya yaseGuinea ngoMgqibelo kusihlwa.
La makilabhu kuzokhumbuleka ukuthi kawabhekani njengoba njalo uma ehlangene kuba nothuthuva.
Abeseqoqweni elilodwa u- group A okugcine kuqhwakele iWydad.
Okushayisa abalandeli beDowns ngovalo wukuthi leli qembu seliyikhiphe kabili kulandelana esigabeni somkhumulajezi njengoba nangesizini ephelile ikhishwe iyona.
UPitso “Jingles” Mosimane ( osesithombeni) ongumqeqeshi weDowns ujabule wabuyela nganeno njengoba ezakhe zizophinde futhi zibhekane nale kilabhu yaseMorocco.
“Awukho umdlalo olula kwiChampions League, wonke amakilabhu anzima. Nakwi-Al Ahly sidlulile kodwa bekungelula.
"NakwiWydad kuzoba yisimo esifanayo, into enzima ngabo wukuthi bayalwa abadlali ibhola ngokuthula.
"Kodwa-ke kuzobonakala uma sekufike umdlalo, sizobadlisa abasidlisa khona uma besilwisa nathi sizobalwisa,” kusho uMosimane.