AKALIPHONSI ITHAWULA OWE-KINGS

ASIKALIPHONSI ithawula ngokuvika izembe isikhulu seReal Kings uBongani Ngidi ( osesithombeni) ongumnikazi wale kilabhu.

I-Kings ibambane ngo-0-0 neJomo Cosmos koweNational First Division (NFD) ngoMgqibelo ntambama eKing Zwelithini Stadium, eMlazi.

UNgidi exoxa neLANGA izolo ngeSonto, uthe usenalo ithemba lokuthi ezakhe zisazolivika izembe.

Uthi ubhekene nengcindezi njengomnikazi wekilabhu ukuqinisekisa ukuthi le kilabhu ayibuyeli kwiMotsepe League ngesizini ezayo.

“Ngabe kangibenzi ubulungiswa ngingabongi abalandeli bekilabhu abawa bevuka nekilabhu, bahambela imidlalo ngisho sidlala kude nesizinda sekilabhu. Lokhu kukodwa kuyangikhombisa ukuthi banentshisekelo engakanani ngekilabhu.

"Silwela ukugcina isithunzi sekilabhu kanye nomphakhathi wendawo engakhele kuyona eMophela,” kusho uNgidi.

Uthi emdlalweni wangoMgqibelo balahle amathuba amaningi okushaya amagoli ngabe kukhulunywe okunye.

Uthi umdlalo olandelayo weMbombela United ngelizayo kumele abadlali bazishayele bona le kilabhu.

Uthi uyazi ukuthi iMbombela ilwela ukuyodlala imidlalo yokuhlunga ngakho-ke kakumele bayithathe kancane.

Uthi kumqoka ukubuya nawo wonke amaphuzu agcwele enkundleni yize kunzima.

I-Kings ibeke ithemba layo kuDumisani Msibi owala ukhasha ezintini osekhombise ukuba ngunozinti osezingeni eliphezulu.

UMsibi usevimbe amahlandla amane engangenelwa yigoli kwiNFD okuyizinkomba zokuba ngunozinti ovuthiwe.

Isiyonke imidlalo yeNFD ebingempelasonto ihambe kanje:- TS Galaxy 0, Eagles 1; Maccabi 0, Tshakuma 3; Ajax 1, Cape Umoya 0; Ubuntu 5, Bay 0; Spurs 0, Mbombela 1; TS Sporting 1, Tuks 2; Kings 0, Cosmos 0; Stellenbosch FC 1, uThongathi 2.