Zishaqwe oKlebe izikhulu ebezikhwabanisa
Kutholakale omazisi namakhadi akwaSassa
ZIKHALELWE ngamasongo kaSigonyela izisebenzi ezimbili zehhovisi loMnyango wezaseKhaya eRichmond ngoLwesihlanu ngezinsolo zokukhwabanisa.
Kubikwa ukuthi uphiko loKlebe okuyilona olusingethe lolu daba, lugasele kula mahhovisi lashaqa abesifazane ababili abasolwa ngokwenzela izingane zokufika eNingizimu Afrika izitifiketi zokuzalwa ngokungemthetho besezikhokhisa abazali bazo imali.
ILANGA lithole ukuthi laba besifazane baboshwa nje, kunophenyo olunzulu okuthiwa belwenziwa wuphiko lweCounter Corruption, olungaphansi koMnyango wezaseKhaya KwaZuluNatal.
Umthobo weLANGA uthi ngesikhathi uphiko loKlebe lusesha imizi yalezi zisebenzi, kutholakale amakhadi awu-18 akwaSouth African Social Security Agency (Sassa), okuthiwa aholela imali yezaguga.
“Endlini yesinye kutholakale amakhadi akwaSassa awu-6 nomazisi
abawu-6, abanye babo kabanazithombe. Kusolakala ukuthi bekuzofakwa kubona amakhanda abanye abantu,” kusho umthombo. Uthi namalungu omphakathi abekhala ngendlela izisebenzi zalo mnyango ezisebenza ngayo.
Okhulumela uMnyango wezaseKhaya KwaZulu-Natal, uMnu Cyril Mncwabe, uthe kuyiqiniso ukuthi kuboshwe izisebenzi ezimbili zalo mnyango ehhovisi laseRichmond ngezinsolo zokukhwabanisa.
“Umnyango ufuna ukukhuculula inkohlakalo emahhovisi akwandabazantu, ngakho-ke izisebenzi ezitholakala zenza inkohlakalo zizobhekana nengalo yomthetho. Ngeke sikuvume ukusebenza nabantu abenze inkohlakalo emnyangweni,” kusho uMnu Mncwabe.
Okhulumela uphiko loKlebe KwaZulu-Natal, uCapt Simphiwe Mhlongo, uthi zikhona izisebenzi ezimbili eziboshwe ngoLwesihlanu ngecala lokukhwabanisa. Uthe kulindeleke ukuba zivele eNkantolo yamaCala obuGebengu obuPhathelene nezeMali, eJohn Ross, eThekwini.