Siyabonga ngoxhaso KwaMashu, sesibuyela eMlazi
KUBE kubi kakhulu ukuguqiselwa ekhaya yiChippa United ngoMgqibelo kwazise lo mdlalo bewubukeka ulula nxa kubhekwa ukuthi izitha zethu zidonsa kanzima kwilog ye-Absa Premiership njengoba kuyizona ezibambe ibhuleki.
Kodwa-ke iqiniso elimile wukuthi ngeke wawuqagula umphumela webhola nxa umdlalo ungakagijinywa.
IChippa inabadlali abahle futhi abanesipiliyoni. Kumele sifunde okuthile kuyona okuzosisiza ngokuzayo. Ngibonga kakhulu abalandeli baKwaMashu namaphethelo ngokuseseka kwazise bekuwumdlalo wethu wokugcina khona.
Okube kuhle kakhulu ngokudlala kwethu eMagogo kube yimiphumela yemidlalo emibili yokuqala esiqoqe kuyona amaphuzu agcwele kulandelana.
Ukunqoba kwethu iBaroka neStellenbosch kwasisusa emsileni. Balwa impela abadlali kuleya midlalo.
Nokho okumele sihlale sikukhumbula wukuthi emdlalweni webhola kuba khona onqobayo nohlulwayo. Yize kunjalo kumele sizame ukuhlala singabanqobi.
Nokho okusiphoxile ngokudlala eMagogo kube wukungangquzuki ngobuningi kwabalandeli njengoba besilindele.
Ngethemba ukuthi abalandeli bethu bazofika ngobuningi emdlalweni wethu olandelayo wasekhaya esizowudlala neMaritzburg United eMlazi.
NgoLwesihlanu siqede konke ngokusayinisa uTsepo. Ukhombisile emdlalweni weChippa ukuthi lukhulu asazosenzela khona.
Simfisela inhlanhla kwazise ugabe ngesipiliyoni njengoba esedlale emaligini amakhulu emhlabeni. Sibheke ukuthi ulwazi lwakhe olunzulu luzosisiza kakhulu.
Kuyasijabulisa ukuba nabadlali abathathu abaqokelwe emaqenjini esizwe njengoba sibheke ekhefini leFifa. Laba badlali nguButholezwe Ncube, u-Ovidy Karuru noAndre De Jongh.
Sibafisela konke okuhle kwazise bazokube bemele ikilabhu kula maqembu.
Abaphathi boSuthu babe yingxenye yabakhombise ukweseka AmaBhokobhoko emzungezweni wawo wokubonisa ngendebe yomhlaba eThekwini.
Okungifake ugqozi wubunye nokubambisana ngenhloso eyodwa.
Lena yinselelo kubadlali bamaZulu ukukhuphula igama leKwa
Zulu-Natal nelabaphathi. Sizokulwela ukunqoba okuthile.
Isigungu esiphezulu sekomidi labalandeli sihlela ukuhlangana okokuqala mhla ka-1 kuZibandlela (December) okuyinto emqoka.
Sinxusa nabalandeli ukuwuhambela lo mhlangano.
Senza konke okusemandleni ukukhulisa ikilabhu kanti ukufika ngobuningi kwabalandeli kuzophumelelisa leli phupho esinalo (lokukhula).
Ngizokwenza konke okusemandleni ukweseka leli komidi kwazise lizokuba yizwi labalandeli.