Ibhantinti libulale itshitshi lalishisa
Kuthiwa lisizwe ngudadewabo ukungqongqisa isidumbu
SITHOLWE sesingamathambo, sishisiwe isidumbu sentombazanyana yaseGlencoe okusolwa ukuthi igwazwe yabulawa yisoka layo emuva kwalokho lazivalela naso endlini izinsuku ezingaphezu kwezintathu.
Kubikwa ukuthi uCebisile Luphondwana (15) ( osesithombeni), bese kuphele amasonto amathathu enyamalele kubo, ekipite nesoka lakhe elineminyaka ewu-28 ubudala.
UNkz Zanele Buthelezi, ongubabekazi wesisulu, uthi indodakazi yomfowabo yehlelwa yilo mshophi nje, ibisinakho ukuphuma esandleni, isihlupha, ihambe ekhaya kuphele amasonto ingabuyi ivalelwe yisoka layo.
Uthi ikhuliswe nguyena ngemuva kokulahlwa ngunina inamasonto izelwe.
“Bengisanda kuthola ukuthi ithandana nomfana wasendaweni osanda kuphuma ejele. Ibingabambeki, isiphumile esandleni kunzima ukuyilawula,” kusho uNkz Buthelezi.
Uthi ngoLwesibili lwangesonto eledlule, kunowesifazane oye kuyena wamncinza indlebe ngokuthi uCebisile usendlini yesoka lakhe, selimbulele.
Uthi ube eseyobika emaphoyiseni ngokunyamalala kukaCebisile. Uphenyo lwamaphoyisa luholele ekutheni kutholakale amathambo akhe eseshisiwe.
Ngokuthola kweLANGA ngemithombo yalo, uCebisile uxabane nesoka lakhe okuvela ukuthi belijwayele ukumthela isibhaxu. Kuthiwa limshaye laze lamgwaza, okuthe uma eseshonile lathatha isidumbu sakhe lasigcina endlini yalo.
Kuthiwa libikele udadewabo ofike endlini wazibonela isidumbu simboziwe embhedeni, bahlela ukuthi basishise. Kuthiwa sekuhwalele, basifake ebhaleni, bayosilahla ngaphesheya komuzi okuhlala kuwona isoka, qede basithungela ngomlilo.
NgoMsombuluko amaphoyisa athole umkhondo ngamathambo atholakale eshisiwe abe esephosa isoka ngemibuzo. Liqale laphika kodwa lagcina lilihlanze lonke iqiniso, laze laveza nokuthi belisizwa ngubani ngesikhathi ligila lo mkhuba, zabe seziyabakhalela.
Okhulumela amaphoyisa KwaZulu-Natal, uCol Thembaka Mbhele, uthe likhona icala elivuliwe lokubulala, amaphoyisa abophe abasolwa abathathu okulindeleke ukuba bavele enkantolo maduze.