Sishiye kukhalwa isiphepho e-KZN
Sekusungulwe ikomiti elizobhekana nezindawo ezikhahlamezekile
USINDISE abazukulu nendodakazi yakhe kwagcina kushone yena owesifazane waseThokozani, eMpolweni, eMgungundlovu owelwe yindlu ngoLwe-sibili njengoba bekuhlasele isishingishane esishiye kukhalwa kule ndawo.
UNkz Nonhlanhla Buthelezi, ongomunye wabantu ababili abashonile ngenxa yalesi simo semvelo, uyalele indodakazi yakhe ukuba iyokhosela komakhelwane nabazukulu bakhe abathathu, kanti uzosala awelwe yindlu.
Omunye oshonile nguMnu Sphelele Ndlovu, kanti kulimale abantu abawu-18 ngenxa yale nhlekelele. Ngokuthola kweLANGA, lesi sishingishane siqale emini saphephula inqwaba yemizi, salimaza abantu. Izindawo ezishayeke kakhulu yiseMvundlweni ku- ward 9 nakhona eThokozani ku- ward 1.
ILANGA livakashele le ndawo izolo lafica abantu bematasa, bezama ukuqoqa okusalile. Bekucaca ukuthi umphakathi wakulezi zindawo usenovalo njengoba bekusanemibiko yokuthi lezi zimvula ezinamandla eziphelezelwa wumoya nokuduma, zisazobuya.
UNkz Senziwe Hadebe ongumakhelwane kaNkz Buthelezi, uthe namanje akakholwa ukuthi umakhelwane wakhe ushone kabuhlungu kanje, yize bemthole esaphila.
Uthi emuva kokuthumela abazukulu komakhelwane, ubengumuntu ozolandela kanti kuzowa isihlahla esidilize indlu yakhe ephakathi, washonela khona lapho.
“Ngesikhathi liqala ukuba nomoya, ubengekho umakhelwane eyosiza lapho ajwayele ukuyobamba khona itoho. Ufike umoya usumkhulu izulu selina, wangena endlini wayalela indodakazi yakhe nabazukulu abathathu ukuba bayocasha kwamakhelwane.
“Ubatshele ukuthi yena uzolandela ngoba ubesafuna ukukhongozela amaconsi emvula. Kube wukuphuma nje endlini kwendodakazi yakhe nabazukulu, indlu yasala yawa emuva kokuwelwa yisihlahla. Seyehlile imvula, siphumile sambheka, okuyilapho sibone khona ukuthi ucindezelwe wudonga.
“Ngokubambisana nomakhelwane nabafana bendawo, simbile samthola esaphefumula kancane, kodwa wagcina ngokuthula,” esho. Uthi njengoba imvula isazoqhubeka, banovalo ngoba kabazi noma siyabuya yini lesi siphepho.
UNkz Thunyeliwe Ndlovu ongunina kaMnu Ndlovu, uthi yena usindiswe wukuthi ubesayogqoka ijezi kwelinye igumbi kanti indlu izosala iwe lapho abehleli khona nendodana yakhe.
“Ngithe ngisagqoka ijezi, ngezwa umsindo kungathi khona okudilikayo. Ngithe uma ngiphuma ekamelweni, ngabona umakhelwane wami naye obehleli nathi endlini evele ngekhanda ecindezelwe yizimpahla. Ngizamile ukuzisusa wagcina ekwazile ukuphuma.
“Indodana yami yona ibingasabonakali, ibigqibekile, kuze kwafika omakhelwane basusa izindonga bayithola isivele ithule,” esho.
UMnu Bheki Mbeje osinde ngeNkosi eshaywa wuthayela emqaleni ebuya emsebenzini, uthi namanje usazibuza ukuthi usinde kanjani. Uthi indlela othayela abebendiza ngayo, ubone kungcono ukuba acashe ngesihlahla kanti omunye uzomshaya emqaleni. Imeya yaseMgungundlovu, uNkk Thobekile Maphumulo, ithe okwamanje isibalo sabantu abalimele siwu-18.
“Sikhulumile nondunankulu kanti kuphakanyiswe ukuba kusungulwe ikomiti elizobhekana nalezi zindawo ezithintekile. Siyacela nakosomabhizinisi ukuba balule isandla ukuze kuzosizwa le mindeni,” kusho yena. UNdunankulu waKwaZulu-Natal, uMnu Sihle Zikalala, uvakashele le ndawo eyo
bhonga emswanini.