UPHOSELE UHULUMENI INSELELO USOMNANDI
UPHONSELE uhulumeni inselelo ngengoma umculi kamasikandi, uThokozani “Somnandi” Langa, othi kufanele ibhekisiswe indaba yokunikezwa kwabathile izindodla zemali ezicebisa bona bodwa, kusetshenziswa abantu abathile abagcina bemukela imvuthuluka.
Lo mculi okhala ngale ndaba kwi-albhamu yakhe ethi “Upopayi” - izinsizwa ezizokwehla ngayo zisuka eGoli ziyodla amaholide kaKhisimusi emakhaya. -
Uthi uhulumeni kumele ulufakele izibuko udaba lwama- labour broker (abantu abafunela abathile imisebenzi bese bethatha imali enkulu baholele ababaqashile amakinati), luxoxwe nasephalamende.
Uqhubeka athi isimo somnotho siyantengantenga, kodwa kucetshiswa abathile ekubeni kulambe izindimbane zabantu eNingizimu Afrika.
“Sisebenza sibaningi, kodwa kuceba indoda eyodwa, akuhlukile nokuthi sisebenzela abanye abantu,” kusho uSomnandi. Uthi leli zwe lizophenduka i-Ethopia ngenxa yokugqoza kwamathuba emisebenzi.
“Imisebenzi kayikho, sisebenzela amanye amadoda. Kuthulelweni ingakhulunywa le ndaba ephalemende?” kusho yena.
Uthi le ndaba yama- labour broker, inomthelela ebugebengwini obudlangile ezweni kanti eminye imizi ixabene ngenxa yokuthi kwaziwa ukuthi amadoda ayasebenza kanti kudlalwa ngawo. ‚
“Uhulumeni mawuyiqede le nto yokunothisha umuntu oyedwa kube kulambe izinkulungwane zabantu. Abantu abasebenzayo bafana nabangasebenzi ngenxa yale nto.
“Thina sihola imvuthu, kawukho umuzi ongawakha ngezinsalela. Le nto yokuqashwa ngabantu ngalolu hlobo iqhatha amadoda nemindeni yawo, amanye agcwele komashonisa kodwa athi ayasebenza.
“Izisebenzi ziyakhala izwe lonke, zisebenzela ubala kudle amanye amadoda,” kusho lo mculi. USomnandi uthi kule albhamu unqume ukubeka zonke izinto obala ukuze kwakhiwe izwe.
“Akusizi ngalutho ukucula ngezingoma zothando kuphela ekubeni isizwe sisenkingeni. Yingakho kukhona ngisho izingoma ezifundisa ngobunsizwa.
“Ubona abantu bezibulala nje uma bebhekene nezinkinga zothando, yingoba abanye babo kababuzwanga ubuhlungu bokuqeqeshwa yizingqwele ukuze wazane nobunzima bempilo,” kusho uSomnandi. Ibophele izingoma okubalwa kuzona ethi “Bhinca to Bhinca”‚ “Amadimoni” nethi “Wenzangani”.