Imifundaze ibuyise ithemba kubafundi
Bazimisele ngokubuyisela emphakathini uma sebephothule iziqu zabo
ISHINTSHILE impilo kubafundi abahlomule ngomfundaze weLANGA ngokubambisana neBerea Technical College, abesebelahle ithemba lokuthi bayokwazi ukuqhubeka nemfundo ephakeme.
Laba bafundi ababili bayingxenye yabayishumi abahlomula ngomfundaze nyakenye base beqala iziqu zabo kulo nyaka.
UMnu Muzi Mnguni (45) waseMbazwana uthi kusukela ngo-2010 ubezama, epatanisa ukuze afeze iphupho lakhe kungalungi. Uthi akazange akholwe ngesikhathi ethola umqhafazo ovela kwi
etshelwa ukuthi usehlomule ngomfundaze olinganiselwa ku-R60 000.
"Kangisoze ngilikhohlwe ILANGA neBerea College njengoba besengizame imifundaze eminingi ngaze ngayeka ngingasizakali, kodwa langa limbe ngibone isikhangiso salo mfundaze waseBerea ephepheni, ngafaka isicelo, samukeleka.
"Isifiso sami esikhulu wukuba uma ngiqeda ukufunda ngivule inkampani yami bese inzuzo ngibuyisele ngayo emphakathini ngoba ngiyalwazi usizi lokulangazelela imfundo ekubeni abazali bengenawo amandla. Okwami bekunzima kakhulu ngoba ngikhule ngaphansi kwesandla somzali oyedwa. Namanje ngithi uNkulunkulu mkhulu ngokufunda kwami, ILANGA neBerea College bashintshe impilo yami ebimile,” kusho uMnu Mnguni.
Lo mfundi wenza unyaka wokuqala kwiPublic Management.
Ngakolunye uhlangothi, uNkz Nomalanga Mshengu (24), owenza iHuman Resource Management, uthi impilo ibinzima ngoba unina ubesebenza esitolo, engenayo imali eyanele yokukhokhela isikhungo semfundo ephakeme.
"Kangisoze ngalilibala ithuba engaliphiwa yiLANGA neBerea College, bese ngilahlekelwe yithemba lokufunda ngoba nenhlanhla bengingayitholi, nesimo sasekhaya singesihle. Impilo yami ishintshe kakhulu, nginethemba lokuthi umndeni wami usuzophila kangconywana uma sengiphothulile imfundo yami.
"Ngiyafisa ukuba yisibonelo esihle kwabanye besifazane ukuze nabo bengalahli ithemba baze badayise nangemizimba ekubeni imfundo ikhona,” kusho uNkz
Mshengu.
Uthi kumnandi ukufunda kulesi sikhungo ngoba kukhona konke okudingwa ngumfundi ukuze aphase kahle izifundo zakhe ekupheleni konyaka.
Kulo nyaka ILANGA neBerea Technical College bahlomulisa abafundi abawu-10 ngemifundaze ezobakhokhela baze baphothule iziqu zabo ngonyaka ozayo.
Lo mncintiswano uzovalwa mhla ka-29 kuLwezi (November) kuwona lo nyaka kanti ukuzibeka ethubeni lokuwina, kufanele usike ifomu lesikhangiso, ugcwalise imininingwane yakho bese ulithumela emahhovisi eLANGA noma eBerea Technical College, eThekwini.