Uzokhunjulwa ngamahlaya uGatsheni
Wayeyisikhulu se-African Wanderers isagijima kwiCastle Premiership ngama-'90s
UZOKHUNJULWA ngamahlaya uMnu Alfred “Gatsheni” Ndlovu (92) oke waba yisikhulu seAfrican Wanderers ebidlisa ngamapayipi iKaizer Chiefs isagijima kwiCastle Premiership eminyakeni yo-1990/2000, odlule emhlabeni ngokukhulu ukuzuma izolo ngoLwesithathu.
Ushonele emzini wendodakazi yakhe ebizinze eHowick. Inkonzo yokufihla uGatsheni izokuba ngoMgqibelo ngo-10 ekuseni eYellowood Park Hall, eMontclair, eThekwini, emuva kwalokho ayobekwa endaweni yakhe yokugcina emathuneni aseMobeni Heights.
Namuhla ngoLwesine kuzokuba nenkonzo yomama eLamontville. Sekuwumlando ukuthi uMnu Ndlovu uke wahlala naseLamontville, engumakhelwane womndeni wakwaMadlala ongabanikazi beLamontville Golden Arrows, uRocky (ongasekho) noMato osephethe le kilabhu. UMnu Ndlovu ubambe elikhulu iqhaza ekwenzeni izinto zenzeke kule kilabhu ebambisene noMnu Themba Khwela, uMnu Rhoo Sibiya obengumlandeli omkhulu wale kilabhu nomndeni wakwaMkhize okubalwa uMnu Nhlanganiso noMnu Vusi Mkhize ongasekho emhlabeni.
USiyabonga “Bhele” Nomvethe, owazakhela igama ngokuqhulula amagoli kule kilabhu ebambisene noSbusiso “Rhee” Zuma noPhumlani “BMX” Mkhize, ukhale kakhulu ngokudlula kukaMnu Ndlovu emhlabeni.
Lixoxa neLANGA izolo ngoLwesithathu, iBhele lizwakalise ukushaqeka uma lizwa izindaba zokudlula kukaMnu Ndlovu, lathi lagcina ukumbona ngonyaka odlule futhi eziphilela kahle, kungekho lutho olukhombisa ukuthi akaphathekile kahle empilweni.
Uthi kuningi angakusho ngoMnu Ndlovu kodwa okugqamile wukuthi ubengumuntu obenamahlaya.
Uthi isikhathi esiningi bengabadlali, bekuyaye kugcine kube lukhuni ukusuka eduze kwakhe.
Uthi ihlaya asalikhumbula ngoMnu Ndlovu, yingesikhathi iWanderers inomdlali osuka eMalawi, uRicky “Ace” Phuka, ongasekho emhlabeni, ayehlale emsola njalo ngokuhlupha nakuba eholelwa imali engcono kunabanye abadlali.
“Ngibuhlungu kakhulu ngokudlula kukaNdlovu, kwazise ngikhuliswe nguyena kubaQulusi. Namhlanje ngiyahlonishwa yingenxa yegalelo lakhe. Ufike kwiWanderers wafaka uzinzo. Ngifisa ukuthatha leli thuba ngiduduze umndeni wonke ngokudlula kwakhe, sengathi ungabopheka ngebhande likaMoya oyiNgcwele,” kusho uNomvethe.
UNkz Dudu Ndlovu, oyindodakazi kaMnu Ndlovu, uncome ubuhlakani bukayise. Uthi konke abekwenza ubengakhohlwa yizinsuku zokuzalwa kwezingane zakhe.
Kubadlali abakhiqizwe yile kilabhu kungabalwa uWelcome “Mshini” Mazibuko, uMoeti Khasu, uMbongeni “Mbopha” Mthembu noHelma Mkhalele oyiwele likaHelman Mkhalele owagqama kwiJomo Cosmos ngaphambi kokunikela kwi-Orlando Pirates.