UMJAHO KWESOKUHOLA I-DA
YIZINKANI zababili emjahweni wesobuholi besikhashana beDA phakathi kukaMnu John Steenhuisen - njengamanje ongumholi waleli qembu ephalamende - noMnu Makashule Gana ongumholi wesifunda saseVaal kuleli qembu, emuva kokuhoxa kulo mjaho kukaMnu Bonginkosi Madikizela waseWestern Cape.
I-DA ike yaba sehlane ngokwesula kosondonzima bayo, uMnu Mmusi Maimane obeyihola noMnu Athol Trollip obengusihlalo waleli qembu, emuva kokukhethwa kukaNkk Helen Zille kwesokuba ngusihlalo weFederal Council omusha.
Ozoqokwa uzobamba kuze kube nengqungquthela ngo2020. Bane abakhankasela esikasihlalo sona esishiywe nguMnu Trollip, okunguMnu Dharmesh Dhaya ongusotswebhu omkhulu kuMasipala iBuffalo City, uMnu Ivan Meyer oyisekela likasihlalo kuzwelonke futhi ongungqongqoshe wezemali eWestern Cape, uMnu Khume Ramulifho oyilungu lesiShayamthetho saseGauteng noDkt Nomafrench Mbombo ongumholi weWomen Network futhi abe ngungqongqoshe wezempilo eWestern Cape.
Ngokwencazelo kasihlalo wokhetho lukazwelonke kwiDA, uNkk Desiree Van Der Walt, ukhetho luzolandela inqubo eyejwayelekile. Uthe bonke abangenele ukhetho bazokwethula izinkulumo zabo ngesigaba sangeSonto sengqungquthela lapho bezozama khona ukwanelisa izithunywa ukuba zibakhethe.
Isikhundla sikasihlalo kazwelonke izithunywa ziyoklelisa abaholi ngokulandelana kwamavoti abawatholile.
NgoLwesibili kuthiwa uMnu Gana uthumele incwadi emalungwini ngaphambi kwalolu khetho, ethi iqembu malingalokothi liyishaye indiva eyobuzwe uma licangcatha inqubo yalo yokulinganisa amathuba. “Kwabaningi abamnyama, 'ubumnyama' buhambisana nesimo sabo sezo-mnotho esibi kakhulu uma siqhathaniswa nesabamhlophe abangozakwabo. Akulimazi ndawo ukusamukela lesi simo,” kusho incwadi.
UMnu Gana ubeka iphuzu elithi kuwukuzenzisa ukusebenzisa abaholi abamnyama ukuze kuzuzwe amavoti, khona lapho kube kugcizelelwa ukuthi ubuzwe abusebenzi.