Kuvele okushaqisayo ngokufa kowaseMUT
"Umsolwa wathi ufuna ukukhombisa ukuthi uyasishaya isibhamu"
IZWE ubufakazi obushaqisayo iNkantolo eNkulu yaseThekwini ngendlela okuthiwa wabulala ngayo uNkz Zolile Khumalo owayeyisitshudeni saseMangosuthu University of Technology (MUT) umsolwa, uMnu Thabani Mzolo.
Ukuqulwa kwaleli cala kuyaqhubeka phambi kwejaji, uNkz Nompumelelo Radebe, kushushisa u-Adv Nadira Moosa kanti omele uMnu Mzolo ngu-Adv Bonokwakhe Dlamini.
NgoMsombuluko umbuso ubize uchwepheshe ongungoti wezemisizi yezibhamu, uNkz Mmabatho Mehlape, obephethe imiphumela yocwaningo olwenziwa ngamaphoyisa emuva kokudutshulwa kukamufi.
Le miphumela iveze ukuthi ofakazi, uMnu Simiso Buthelezi noNkz Nosipho Bhengu, batholwe bengenawo uphawuda wesibhamu, kodwa izinsalela zawo zitholakele ezandleni zikaMnu Mzolo. Kuke kwaba nemibuzo ngokupelwa kwesibongo sikaMnu Mzolo emaphaketheni abephethe leyo miphumela, obekubhalwe ukuthi “Mzoko” esikhundleni sikaMzolo.
Ummeli uvele wagxila kulokho, nokho ijaji lathi kuzomele kuchaze ababebhala ngemishini. Kube sekungena uMnu Buthelezi othe ngosuku lwesigameko, mhla lulunye kuNhlaba 2018, uMnu Mzolo wafika egunjini ahlala kulo eLonsdale Hotel, eThekwini, wacela ukugeza, wamvumela.
Uthi wamcela ukuba ayothenga i- airtime, nokuthi adlule egunjini likamufi amcelele okusajezi kuye.
Uqhubeke wathi wakwenza lokho, kodwa kwathi sekuhlwile bagcina sebeya egunjini likamufi bamfica enomngani wakhe, okuyilapho uMnu Mzolo wakhokha khona isibhamu, uMnu Buthelezi wazama ukumkhuza ethi angamdubuli umufi ngoba ubethe yena (uMzolo) uzolungisa izinto.
Nokho wagcina emdubula naphezu kokuba waqale wenza sengathi uyamxolela, kwangathi uyavalelisa.
“Wathi kumufi makamqabule, okwathi eseya kuyena esaba, ekhala, wathi kuye umfisela inhlanhla, esho nokuthi ufuna ukukhombisa amadoda akhe ukuthi uyasishaya isibhamu, efanekisa ukudubula ngomunwe wesikhombisa.
“Ngaleso sikhathi umufi wazama ukucasha ngemuva kwami, kodwa ummangalelwa wakwazi ukumdubula amahlandla amabili. Yize wayesebukeka ethule, waphinde wamxhakathisa ngasentanyeni wamdubula ekhanda,” kusho uMnu Buthelezi.
NgoLwesibili kudlalwe imisindo eyacashunwa kumakhalekhukhwini okuthiwa ngokammangalelwa, lapho kuzwakala khona amazwi ababili, omunye ezishaya isifuba ngokuthi usembulele uZo ngoba umdelelile ngokuthi kukhona umfana omkhombise isithombe enaye.
Khona lapho kuzwakala othile etshela omunye ukuthi makaphume kule ndawo akuyo, kodwa lona okuthiwa makaphume uthi ngeke esaphuma, kunabantu abaningi ngaphandle.
Ebuzwa ngumshushisi ukuthi ngamaphimbo obani lawa akhulumayo, uMnu Buthelezi uthe ngelikammangalelwa, elakhe nelikaNtobeko Nzuza owayekhona kukhulunywa.
Ummeli kaMnu Mzolo uxine ngemibuzo uMnu Buthelezi, emhila ngesitatimende asenza emaphoyiseni naleso asenze bukhoma enkantolo.
Uqale ngokumvezela ukuthi kwesinye uthe ngesikhathi bengena endlini kamufi, kwangena ummangalelwa kuqala ekubeni
Yize wayesebukeka esethule, wamxhakathisa wamdubula ekhanda.