BATHI ISITELEKA SIZOBALIMAZA KAKHULU
IBAMBA likasihlalo weSAA, uNkz Thandeka Mgoduso, likuqinisekisile izolo ngoLwesithathu ukuthi izinyunyana zezisebenzi, iNational Union of Metalworkers of South Africa (Numsa) neSouth African Cabin Crew Association (Sacca) ziyazisile le nkampani yezokundiza ngenhloso yazo yokuteleka kusasa.
UNkz Mgoduso ubevele phambi kwekomidi lezemali ephalamende, iStanding Committee on Public Accounts (Scopa). I-SAA imemezele ngoMsombuluko ukuthi izozihlela kabusha, okuyisinyathelo esingase siphazamise imisebenzi ewu944.
I-Numsa neSacca zexwayise ngokuthi amalungu azo alungiselela “isiteleka esikhulu kunazo zonke kwaSAA”.
NgoLwesithathu iSAA inike iScopa izizathu zokuthi kungani yehlulekile ukwethula umbiko wayo wonyaka ka-201819 nencazelo yokusebenza kwemali njengoba kudingeka yenze njalo ngokwePublic Finance Management Act.
Ithimba leSAA libikele iScopa ukuthi liphoqwe yisimo ukwethula umbiko njengoba kunongabazane lokuthi le nkampani bangayichaza njengebhizinisi elisimeme.
Eminyakeni ewu-13 edlule, le nkampani ilahlekelwe wu-R28 billion. Ikomidi leScopa kaligculisekanga yile ncazelo, kodwa linikeze le nkampani ithuba lokuchaza isimo sayo sezemali.
Ilungu lebhodi yakwaSAA, uMnu Martin Kingston, lazise iScopa ukuthi lesi siteleka esihlongozwayo, sizokwenza isimo sezemali kule nkampani siqhubeke ngokuba sibi .
UMnu Deon Fredericks, oyisikhulu sezemali kwaSAA, utshele isigcawu sabezindaba ngoLwesibili ukuthi lesi siteleka sizobeka ebucayini iSAA, futhi singase siqede yonke imisebenzi kule nkampani.
Wengeze ngokuthi izisebenzi ziyingxenye ewu-24% yezindleko zenkampani.
Ngokusho kwabeFin24, kukholakala ukuthi iSAA njengamanje isengcindezini yokuthola u-R2 billion odingeka ungakapheli uLwezi (November) ukuze ikwazi ukuqhubeka nokusebenza. Nokho uhulumeni kawusazimisele ngokuqhubeka nokuyinikeza uxhaso.
Bheka ekhasini 16 no-17