Uvuna izithelo zokuzikhandla
Uqokelwe kumaCrown Gospel Music Award kulo nyaka
UZICHAZA njengofikelwe yisizini enhle yokuvuna akutshalile umculi we- gospel oqokwe kumaCrown Gospel Music Award anonyaka emkhakheni weBest Newcomer, uPuleng March. Lo mculi obecula kuvuke uhlevane kwiJoyous Celebration iminyaka emithathu, uvunywe wunyaka njengoba esanda kusungula ilebuli ethi yena, iKemotho Entertainment, asanda kukhipha kuyona i-albhamu yakhe entsha ethi, “Marching On.” Ngaphezu kwalokho, unebhizinisi lapho egqugquzela khona inhlalonhle komakoti abasebancane emizini ukuze kuvuseleleke imishado, iMakoti Enkosini. Ekhuluma ngokuqokwa kwakhe kumaCrown, ubonge ubukhulu bukaNkulunkulu wababaza namandla aKhe. “Uma ngibuyekeza impilo yami ngaphambilini, ngifikelwa umunyu ngoba omubi ufikile ezontshontsha okuningi empilweni yami. Kukho konke ufikile uBaba (uNkulunkulu) wangesula amanxeba, waphefumula impilo (kimina). Namuhla ngiziphethe futhi ngenza umsebenzi engiwuzwa ngaphakathi wokudumisa. “Okwenzeka empilweni yami kuyinkomba yobukhulu baKhe, engifisa ukukhumbuza abaningi ukuthi akekho umuntu onempilo encike komunye ngaphandle kukaNkulunkulu ohlale enecebo.” Akagxilanga ezingqinambeni adlule kuzona ngaphandle kokuthi ufisa ukuba wonke umuntu aphole kubo bonke ubunzima obuza nempilo ngoba kukhona impilo entsha emlindile ngale kwaleso simo. Mayelana nebhizinisi lakhe iMakoti Enkosini, uPuleng uthi imbewu yalo itshaleke ngesikhathi engena emshadweni ebona ukubaluleka kwesisekelo sokholo. “Kumnandi emshadweni kodwa kudinga ukuba uwunakekele. Ngiyakuqonda ukuthi eminye iphetha kabuhlungu kodwa kakunjalo kweminye. Yingakho kubalulekile ukuba sibambane ngezandla sithelelane ‘ngalolu twayi’ olumnandi lokucobelelana ngezindlela ezenze omunye waphumelela. “Kumnandi kakhulu uma ungumakoti osemncane, okwaziyo ukungena edolweni futhi lokhu ukwenze kube samfashini. Isipho sami wukuphilisa ngephimbo kodwa nami ngiyafisa ukuphiliswa ngezinkulumo nokunye. Yingakho sihlangana sivuselelane singomakoti ngoba siyadingana.” Uthi into eshaya omakoti abasebancane muva nje wukusindwa wumthwalo womndeni womyeni. “Omakoti abaningi bavele bephelelwe yisineke abanye bangenwe yitwetwe lokungakwazi ukumelana nezingqinamba zasemzini. Yingakho siba nemijikelezo emadolobheni ehlukene lapho sipholisana khona amanxeba, sethulane nemithwalo,” kusho uPuleng. Ngaphandle kokuba ngumculi, ungumama wabantwana ababili futhi useneminyaka ewu-10 eshadile. “Ukuphilisa kuwubizo lwami. Lokhu kubonakala ngesandla sikaNkulunkulu esivela kukhona konke engikuthintayo,” ephetha.
Uzalelwe eKimberley. Uqale ukucula esontweni eneminyaka ewu-3. Ngo-2011 ubeyingxenye yeLion King, elingisa indawo kaNala. Uke wacula noKirk Franklin enkonzweni yesikhumbuzo kaTata Nelson Mandela. Uphinde wacula emngcwabeni kaRobbie Malinga.