Uphisana ngengubo yomshado enobu-Afrika
BUSALOKHU buqhubekile ubudlelwano obuhle phakathi komsiki wengqephu ohlonishwayo eNingizimu Afrika, uDavid Tlale ( ogqoke
okumnyama esithombeni) nabenkampani iTastic njengoba ngempelasonto bekwethulwa ngokusemthethweni ingqephu yomshado, okuyingubo kamakoti nabaphelezeli bakhe, eqhakambisa ubuhle bamagugu nesintu. Lo mcimbi obewenziwe kulandelwa ingqikithi yomshado ubungoMgqibelo eZuri Beach, eMargate. UTlale uthe ngale misiko ufisa ukunika lowo makoti ozoba nenhlanhla ithuba elingandele bani lokushada ehlobe ngomsiko wakhe.
“Ngesikhathi ngimatasa nalo msiko, besenginaso isithombe sokuthi ngumakoti onjani ozobe ehlobe ngawo. Ngisho uhlobo lwendwangu engiyisebenzisile nemihlobiso ehambisana nayo igxile kakhulu kumagugu ethu,” esho. Uphinde wathi amandla okuyenza agqugquzelwe yizimfundiso zikanina ongasekho, uNkk Joyce Tlale, oshone ezinyangeni ezimbalwa ezedlule.
IMarketing Director yeTiger Brands, uNkk Thembisile Sehloho ithe inhloso yabo enkulu wukuqhubeka ezinyathelweni zerice, elihlale liyingxenye yokudla okubalulekile empilweni yabaningi uma kukhalwa noma kujatshulwe.
“Yingakho sibone kuyicebo elihle ukuba sihlanganyele noTlale, ongomunye wabasiki bengqephu abahlonishwayo ukuze sinike umakoti wethu isipho angeke asikhohlwe, sokuwina le ngubo ngosuku lwakhe lomshado,” esho.
Uthe kumanje kunomncintiswano ovuliwe wokuwina le ngubo ebiza u-R50 000 kanti imininingwane yawo seyiqalile ukumenyezelwa emisakazweni nasezinkundleni zokuxhumana.
Ubudlelwano phakathi kukaTlale nabeTastic buqale ngoMandulo (September) ngesikhathi kwethulwa iphakethe elisha le- rice elihlotshiswe ngemibala nangemidwebo exoxa umlando weNingizimu Afri
ka.