ABELUNGU BATHI ASONDLE OBHEJANE SIBE SIHLUPHEKA
NJENGOBA sekusondele uKhisimusi nje, umuntu usevika abelungu abacelayo, bethi bacela imali yokuphephisa obhejane, amabhubesi nezinye izilwane zasendle. Mina ngikholwa wukuthi uma isikhathi sazo sesiphelile, siphelile, ngakho masingazenzi onkulunkulu basemhlabeni.
NgoMsombuluko bengiyozithengela igilosa, futhi ngingafune sicefe, kwazise besiwisa amabhodlela ngayizolo. Phela amabhabhalazi ayahlukana; kunaleli othi uma uvuka ekuseni, uzwe ikhanda lizimuka selikusinda ungafunga ukuthi lingangezintaba zoKhahlamba, uzwe sengathi nobuchopho bufakwe amanzi, sebuthambe wena owabona umdokwe.
Lithi uma likhala iqhude ekuseni, uzwe sengathi likhala lapha ngaphakathi ekhanda, ufise sengathi ungathi malihlatshwe ukuze lithule.
Uma owakwakho esanda kubeletha, ungaze umxoshe uthi makayovakashela abakubo ngoba sebemkhumbule. Phela abantwana nabo basuke bakhale kakhulu, bangathuli, sengathi bayazi ukuth uphethwe yilalavuka.
Uma lingakuphethe, ingane imane ingakhali usuku lonke - ilokhu imane izihlekela nje - ungafunga ukuthi ivakashelwe nguJesu uqobo, maqede wayifakela leli wayini lakhe alenza ngamanzi encenceni.
Leli bhabhalazi ulithola uma kade uphuza utshwala obushibhile. Kunaleli elinye elenza indoda imfome ibunzi kubanda njengomculi wodumo osewasishiya, uBarry White. Phela le mambana yayijulukiswa wukucula nje kuphela, ingadansi nokudansa. Yayiphatha iduku likasilika elikhulu, owawungafunga ukuthi yithawula lokugeza umzimba.
Yayijuluka ihlezi phansi esihlalweni icula oPractise What You Preach noBaby You are the
First, the Last and my Everything, kodwa-ke yayiyisilomo kwabesifazane. Yayinezwi elindondozelayo, imbodlomane yangempela, exegisa ilastiki yamabhulumasi.
Oliqgokile, abone selisemaqakaleni, angazi ukuthi lifike kanjani lapho. Asidlule-ke koBarry ngoba iningi labo kalisekho emhlabeni, kubalwa noBlackberry!
Leli bhabhalazi likwenza uphelelwe ngamandla, futhi inhliziyo ibe mnyama, kungangeni lutho esiswini.
Lijwayele ukuhlasela laba bakhwenyana abathi bazama ukukhipha amahloni netwetwe. Umthole umuntu esejuluka yedwa etendeni, ebukwa ngabantu bonke.
Umfundisi lapho ashumayele amahora ngamahora, engaqedi, ubone nje ukuthi lona oshadayo usomele ubhiya ngale ndlela yokuthi ungamlayitha ngomentshisi amane avuthe ubuhanguhangu okomlilo wequbula.
Le nhlobo yebhabhalazi yenziwa wutshwala obusezingeni eliphezulu, kodwa uma kwenzekile wathatha ngamawala.
Kunaleli elenza umuntu anuke, kuthi uma esondela ebantwini, kunuke ixhaphozi noma umuthi wokuchatha osuhlale isikhathi eside ungasetshenziswanga. Uthole iphunga seliziphumela ngeziqu zoboya.
Le nhlobo uyithola kakhulu ebantwini abaphuza imfulamfula nogavini.
Mina-ke bengiphethwe yileli elimfomisa ibunzi, ngicobeke amathambo sengathi bengibhema insangu.
Ngithe ngifika esitolo ngathola izalukazi ezintathu zimi emnyango, ziphethe izikoqokoqo nomshini wemali. Zangivimba wena owabona kuvinjwa inkukhu ukuthi ingene ehhokweni.
Ngithe uma ngibuza ukuthi kanti bangomantshingelani yini, nokuthi akusangenwa yini kulesi sitolo, bathi cha bacela imali yokuphephisa obhejane. Ngithe uma ngibuza ukuthi mina ngihlanganaphi nobhejane, bathi lezi zilwane zingamagugu ezingane zethu. Hhayi-ke, ezami izingane kazinandaba nobhejane, amabhubesi, izindlovu nezingwe; amagugu azo wumakhalekhini nezimpahla zikanokusho.
Ngibatshele ukuthi lezi zilwane zingamagugu abelungu baphesheya, hhayi izingane zethu.
Bathe kimi uma lezi zilwane zishabalala, izingane zethu ziyozibonaphi, ngabatshela ukuthi kasisekho isidingo salezi zilwane ngoba phela umsebenzi wazo kwakuwukugwema ukwanda kwethu njengabantu nalezi zilwane ezidla utshani.
Kwakuyindlela kaNkulunkulu yokuqondisa izinto, manje kasisekho leso sidingo. Ngasho nokuthi zonke izilwane ziphila ngoba kunesidingo. Bathe bayaqhubeka ngathi ngiphethwe yibhabhalazi, leli elingasifuni isicefe, kanti bona sebephenduka sona.