UProf nesikhungo
UNgubane ukhathazekile ngokufa kwabebhola bengophuya
UZIMISELE ngokulwa nesihlava sokuxhashazwa kwabadlali bakanobhutshuzwayo yizimenenja ngenxa yokushoda ngolwazi lwemfundo uMlungisi “Professor” Ngubane osungule isikhungo sokuthuthukisa intsha esibizwa ngeMlungisi Ngubane Sports Development and Football Academy esizothulwa ngokusemthethweni ngomhla ka-7 kuZibandlela (December) eMoses Mabhida Stadium, eThekwini.
UProfessor utshele ILANGA ukuthi kulesi sikhungo kuzothathwa abadlali besigaba sika-U/13, U/15, U/17 no-U/19. Uthi lesi sikhungo sizozinza eThekwini njengoba eveze ukuthi bazosebenzisana kakhulu neComtech eMlazi kanjalo neBrettonwood High eseRossburgh.
“Sizoqikelela ukuthi sigxilisa kakhulu nenhlonipho kubadlali. Inhloso yethu wukuba kwakheke isizwe esiphilile esingabhukudi ezidakamizweni esezibulale ikusasa labadlali abaningi kuleli.
"Umdlali esimbonayo ukuthi akanalo ikhono elingamphilisa ebholeni sizomeseka ukuba aphume ephekekile emfundweni.
"Empeleni nabadlali abanekhono sifuna baqede u-matric bepholishekile ukuze bezoqonda kahle yonke imibhalo uma besayina izinkontileka. Bangazibophi ngezinkontileka ezibacindezelayo ngoba bengenalo ulwazi,” kusho uProfessor.
Uqhube ngokuthi abadlali bazosizwa ngongoti bezemfundo bengakafiki kwamatikuletsheni ngolwazi lwemikhakha abangayifundela (career guidance) uma sebekhulile.
Udalule ukuthi sebekhona vele othisha abayizingcweti emikhakheni ethile ikakhulukazi kwiMathematics nakwiPhysical Science asebevumile ukuthi bazonikela ngesikhathi sabo ukusiza abadlali amahora athile ngosuku.
Uthi basaxoxisana nabanye ukuba nenqanawe (yothisha) ezokhipha ukhilimu wodwa wabadlali.
Ugcizelele neyokuthi ngisho abaqeqeshi abazocija abadlali kuzokuba ngabaqokwe ngokukhethekile njengoba bengafuneki abangazihloniphi.
“Inhlamba kangiyisebenzisi nhlobo kwami. Pho ngingamethuka kanjani umdlali uma ngimfundisa ukudlala ibhola ngoba naye usuke efana nengane yami?
"Selokhu ngaqala ukuqeqesha kangikaze ngibethuke abadlali. Nabaqeqeshi esizosebenza nabo kuzokuba ngabangenayo inhlamba,” kusho uProfessor.
Uthi abadlali kumele baphase ngamalengiso okuyinto ezobafaka begijima emanyuvesi bagcine bengazikhokheli izifundo ngenxa yekhono labo, baphinde bakwazi ukuziphathela ngendlela imali, bangafi bengophuya njengoba kuyinto eseyijwayelekile kwabebhola kuleli. Kulolu hlelo usevele unabo abamesekayo njengeNdabase Printing Solutions nabeCrescendo Management Solutions.
ITHUBA lokuhlabana ngemiklomelo econsisa amathe kubathandi bakanobhutshuzwayo abazohambela imidlalo yeMultiChoice Diski Challenge (MDC) eteketiswa ngeleDerby Festival ngoMgqibelo eDobsonville Stadium, eSoweto.
Abathandi bebhola abazokuba nenhlanhla bazogoduka nama-DStv Explora namavawusha enani likaR1000 okuthenga igilosa.
Ngaphezu kwalokhu, abazohambela le midlalo bazozitika ngomculo kaSamthing Soweto ngesikhathi sekhefu.
Kuzovula umdlalo womkhaya baseThekwini, iLamontville Golden Arrows Reserves namaZulu FC Reserves ngo-11h00.
Lo mdlalo uzokwandulela owomkhaya baseTshwane ozokuba phakathi kweMamelodi Sundowns Reserves neSuperSport United Reserves wona ozokuba ngo-13h00. Usuku luzosongwa ngomdlalo obhekwe ngabomvu phakathi kweKaizer Chiefs Reserves neOrlando Pirates Reserves ozokuba ngo-15h00.
Yomithathu le midlalo izoboniswa bukhoma kwiSS4 nakwiSS10 naseziteshini zomphakathi ezitholakala kwiDStv.
Kuzongenwa mahhala, kodwa umphakathi uyanxuswa ukulanda amathikithi ahamba ngamabili eDobsonville Stadium namuhla ngoLwesine nakusasa ngoLwesihlanu kusukela ngo-13h00. Ngaphandle kwemidlalo yomkhaya ezosingathelwa eSoweto, ikhona neminye emibili ezokube iqhubeka ezifundazweni ezahlukene.
IPolokwane City Reserves izokhiphana inkani neBaroka FC Reserves kowomkhaya basePolokwane ngoMgqibelo ngo-10h00 e-Old Peter Mokaba Stadium, eLimpopo. IStellenbosch FC Reserves izodlala neCape Town City Reserves kowomkhaya baseWestern Cape ngeSonto ngo-10h00 eMalta Park Sports Ground, eCape Town.
Imidlalo elandelayo yeMDC ehambisana nomcimbi wenjabulo, izokuba ngoMgqibelo mhla ka-23 nangakusasa ngeSonto mhla ka-24 kwephezulu oLundi Stadium, Ondini.
USandile Luthuli wezokuxhumana kwaMultiChoice, uthi balindele ukuba umphakathi uphume ngobuningi eSoweto njengoba ichithiwe imidlalo yomkhaya.
Isiyonke imidlalo yeMDC kule mpelasonto ihlelwe kanje: NGOMGQIBELO EDobsonville Stadium: AmaZulu Reserves vs Arrows Reserves 11h00; Sundowns Reserves vs SuperSport Reserves 13h00; Chiefs Reserves vs Pirates Reserves 15h00.
E-Old Peter Mokaba Stadium: Baroka FC Reserves vs Polokwane Reserves 10h00.
EMakhulong: Highlands Reserves vs Wits Reserves 10h00.
EHarry Gwala: Maritzburg United Reserves vs Celtic Reserves 10h00. NGESONTO EThohoyandou: Black Leopards Reserves vs Chippa United Reserves 10h00.
EMalta Park Sports Ground: Stellenbosch FC Reserves vs Cape Town City FC Reserves 10h00.