Engikufunde emzungezweni wamaBhokobhoko
NGESIKHATHI AmaBhokobhoko enqoba indebe yomhlaba okokuqala ngqa emlandweni wawo ngo-1995, bengisewumfanyana ngingazi nokuthi lidumephi ngalo mdlalo.
Empeleni izinto ezenzeka ngaleso sikhathi ngize ngazibona kahle sengikhulakhulile, ngizibuka ziphindwa kumabonakude.
Ngeshwa, ngo-1995 umabonakude ubuyivela kancane ezindaweni zasemakhaya. Ngaleso sikhathi bengingazi lutho ngebhola lombhoxo kwazise umuntu ubezikhahlelela ibhola likaplastiki, okwakuthi uma ukhishwa enkundleni, uthathe ibhola lakho uhambe nalo.
Kuthe ngokuhamba kwesikhathi namehlo esevulekile, ngakwazi ukubona ukuthi lungakanani ushintsho olwenzeka ngokunqoba kwelakuleli leya ndebe yomhlaba. Ngo-2007 ngesikhathi
AmaBhokobhoko ephakamisa le ndebe ihlandla lesibili eFrance, bese ngiqalile ukuwulandela lo mdlalo nakuba bengingagxilile kangako kuwona, kodwa kukhona ebese ngikwazi ngawo.
Engikukhumbulayo nje wukuthi indlela esinqobe ngayo lo mqhudelwano, icishe ifane nalena eyenzeke nonyaka.
Impumelelo yethu nonyaka kubukeka kube nawukugwema kowamanqamu amazwe afana neAustralia ekhiphe elakuleli kwiquarter final yalo mqhudelwano ngo-2011, neNew Zealand nayo eyasephuca iqatha emlonyeni isikhipha kowandulela owamanqamu ngengcuphe ka-20-18 ngo2015 e-England.
Ukukhulela emndenini ozifelayo ngezemidlalo kwenze kwangaba nzima ukuloba ngalo mdlalo ngesikhathi nginikwa lelo thuba kwiLANGA kwazise ngithole ukwesekwa okukhulu kozakwethu engibafice kule ndima.
Ngifunde lukhulu nakuSazi Majola ongumhleli wezindaba kwiLANGA njengoba bengihlala ngimhlupha ngicela ukuba angicathulise ukuze ngikwazi ukuthuthukisa ulwazi lwami kulo mdlalo. Bekwala ngisho ngimfica ematasa kodwa ubehlala engicathulisa njalo, ngiyabonga kakhulu kuMajola.
Ukuhambela imidlalo yeSharks eThekwini nakho kungifundise lukhulu ngalo mdlalo.
Nokho uvuthondaba lwakho konke kube wukujutshwa kwami yileli phephandaba ukuhamba namaBhokobhoko emzungezweni wawo ekhangisa ngale ndebe ukusuka eThekwini kuze kuyoshaya eCape Town. Kangikholwanga ngesikhathi ngifika eGarden Court yaseMhlanga ngoLwesihlanu ekuseni ukuyohlangana neqembu lesizwe kwazise ngifike abalandeli sebegcwele izitaladi zakhona.
Ngithe ngifika nje kule ndawo uLikha wakwaFNB, okunguyena ebesilokhu sixhumana naye, wangiyalela ukuba ngingene ngaphakathi ngingami nabalandeli.
Ngithe nje ngingena abadlali bese bemi ndawonye sebelungiselela uhambo lokuzungeza iTheku emuva komjikelezo oqale ekomkhulu lakuleli, ePretoria wadlulela eGoli namaphethelo ngoLwesine olwedlule.
Ngiqale ngathuswa yindlela abalandeli abebekade bephume ngayo, okuthe ngokuhamba kwesikhathi ngazibona sengimdibimunye nabadlali beqembu lesizwe.
Ngiqale lapho ukukhulumisana nabanye abadlali njengoba ngithole ithuba lokuxoxa noMakazole Mapimpi noSteven Kitshoff, kuthe kungakapheli sikhathi esingakanani ngathuka sengihlangana nomqeqeshi uRassie Erasmus.
Ngimbingelele, saxhawulana ngabe sengimbuza ukuthi uzizwa kanjani uma ebona abalandeli beqembu bephume ngale ndlela. Uphendule ngokuthi kuyajabulisa kodwa futhi kushayisa ngovalo uma sekwenzeka ngalolu hlobo.
Ngibe sengimdedela njengoba bengibona ukuthi uyaphuthuma.
Ngesikhathi singena eCity Hall yaseThekwini okuyilapho izinto eziqale khona ukwenzeka, bekunyimfika, abalandeli behlanya ukubona amaqhawe abo.
Abadlali bebehlelelwe ibhasi elivulekile phezulu kanti nathi besibalandela ngemuva ngalo elivulekile.
Ubungafunga ukuthi nathi singabadlali ngendlela ebesijatshulelwa ngayo.
Ngike ngadideka sijatshulelwa ngabantu ngesikhathi kuqhubeka lolu hambo. Abanye ebesihamba nabo ebhasini baze bangibuza ukuthi yini abantu bengijabulela kangaka.
Empeleni ngize ngathola kamuva ukuthi konke lokhu kujabula okungaka kwenziwa wukuthi bengihleli noMaps Maponyane oyindodana yesilomo sikanobhutshuzwayo, uMarks “Go Man Go” Maponyane owayengalibheki ipali.
Sifike eMoses Mabhida Stadium lapho ebesiyophetha khona umzungezo waseThekwini sangena, sacosha okuya ngasethunjini sabe sesiphuthuma esikhumulweni sezindiza, iKing Shaka, sesibhekisa amabombo e-East London ukuyoqhubeka nalo mjikelezo.
Kangikholwanga ngesikhathi ngizithola ngisendizeni eyodwa namaqhawe esizwe. Indlela abebekade bezijabulele ngayo abadlali ibimangalisa njengoba bebelokhu bedlalisana indlela yonke, ubona ukuthi ubumbano lukhulu kuleli qembu.
Abanye bebezihambela nezinqandamathe zabo bewotawotana indlela yonke. Abanye bebematasa bezishayela iziphuzo ezishisayo ubona ukuthi bajabulile. Sithe sifika nje esikhumulweni sezindiza eMonti safica sesilindelwe yizinkumbi zabantu, sabe sesidlulela ehhotela ukuyogoba izinkophe.
Sivukile ekuseni ngoMgqibelo saqhubeka nohambo. Ntambama silibangise eBhayi. Sithe sizishayelwa wumoya eBhayi sazithela endaweni yobumnandi ebizwa ngokuthi yiCubana.
Lapha ngizithele phezu kweningi labadlali beqembu lesizwe bezithokozisa ngobumnandi. Ngiyithandile indlela abenza ngayo izinto njengoba abanye bebezihambela nophathina babo ukuyozijabulisa.
Lokhu kufike kwanginika isifundo sokuthi kuhle umuntu ahambe nomuntu wakhe ukuya endaweni yokuzijabulisa ukugwema izinto eziningi. Eqinisweni nje, iningi lentsha yanamhlanje likukhonzile ukuzithokozisa ngezimbiza zikaFaro kodwa (iningi) kalithandi ukuhamba nophathina balo, okugcina ngokudala izinkinga eziningi.
Ngenhlanhla nje ngibe nethuba lokuhlala eduze kwalaba badlali ngaqonda okuningi ngabo, ikakhulukazi ukuthi bayazifela ngezwe labo. Okunye engikuqaphelile wukuthi ngesikhathi bezithokozisa bekukhona abaqaphi abebekade bebabheke ngelokhozi kwaze kwaba kuyehlukwana, kuyolalwa.
Ngichazekile ngamazwi akhulunywe nguSiyamthanda “Siya” Kolisi ongukaputeni ngesikhathi kusongwa lolu hambo ngoMsombuluko eCape Town.
“Niyasibona ukuthi sivela ezindaweni ezahlukene kodwa sihlangane ngenxa yokwenza umehluko ezweni lethu. Nani hlanganani niyeke ukukhombana ngeminwe, nilwele izwe lethu,” kusho uKolisi. Ubekhuluma la mazwi eCity Hall yaseCape Town okuyilapho owayengumengameli wokuqala wentando yeningi kuleli, uNelson Mandela (ongasekho) ethula khona inkulumo yakhe yokuqala esizweni emuva kokuhlala iminyaka ewu-27 ejele.
Ngisale ngibambe ongezansi ngesikhathi kuqhubeka lo mkhankaso njengoba ngithuswe yindlela abantu baseNingizimu Afrika abebejabula ngayo kusuka komncane kuya komdala, omhlophe nompisholo, bonke behlangene bejabulela amaqhawe abo. Sengathi kungahlala kunje ezweni lethu.
Konke lokhu okwenzekile kangikaze ngiphuphe ngakho kwazise ngiziqhamukela emakhaya eMahlabathini, Ondini, esigodini saKwaMeke. Ngizifundele eGwazinyathi, KwaMame naseTholukukhanya lapho ngiqede khona u- matric ngaphambi kokwenza izifundo zobuntatheli eThekwini.
Ngiyethemba ngilimele kahle ILANGA kulo mzungezo kwazise bengidonswe ngendlebe ngumhleli wezemidlalo ukungalokothi ngininde ngodaka lolu hambo obeluxhaswe ngabakwa-FNB.