Udalula ubunzima obubhekane namaBoks
Kujikwe izinhlelo ngemizuzu yokugcina ngowamanqamu
UDALULA ubunzima ababhekane nabo ngaphambi komdlalo wamanqamu wendebe yomhlaba yebhola lombhoxo u-Aled Walters ongumqeqeshi obhekene nokugcina abadlali bamaBhokobhoko beqatha.
Sekuwumlando ukuthi elakuleli liguqise i-England ngo-32-12 kowamanqamu wale ndebe emasontweni adlule eJapan. UWalters ukhulume naleli phephandaba ngesikhathi kunomjikelezo wokubungaza le nkomishi eyenze ubumbano olukhulu esizweni sakuleli.
“Kusisebenzele kakhulu ukufika kusenesikhathi eJapan kwazise sikwazile ukuqala amalungiselelo ngesikhathi. Bekungelula kodwa sikwazile ukuzuza okuningi. Eqinisweni kasikaze sicabange ukuthi singahlangana ne-England kowamanqamu. Sasilindele ukuthi sizobhekana neNew Zealand kuwona.
“Kakubanga lula ukulungiselela umdlalo wamanqamu njengoba sasinovalo ngendlela i-England eyakhipha ngayo iNew Zealand. Kangifuni ukuqamba amanga ngangesaba ngaphambi kokuqala komdlalo wamanqamu kwazise i-England yasebenzisa itshe lemali ilungiselela le midlalo.
“Kudingeke ukuba sihlale phansi nabadlali ukuze siphume neqhinqa lokunqoba lo mdlalo. Sisizwe kakhulu wukuzethemba kubadlali bethu okwenze sakwazi ukuphumelela lo mdlalo. Osekusele njengamanje wukuba siqhubeke sisebenze kanzima ukuze sigcine umgqigqo wethu,” kusho lo mqeqeshi odabuka eWales.
Kuzo ezebhola lombhoxo, uMengameli weSouth African Rugby Union ( Saru), uMark Alexander uxolisile kubalandeli bezingxenye ezithile eThekwini nasePort Elizabeth abagcine bengalitholanga ithuba lokubona amaqhawe abo ngesikhathi kuba noshintsho ngemizuzu yokugcina ngzinye izindawo.
Nokho uthembise ukuthi esikhathini esizayo bazokwenza izinhlelo zokuhambela izindawo ezithile ukuqhuba lo mjikelezo obe yimpumelelo.