OWODUMO KWI-BUCS KUMA-AMESHA
UMDLALI ozakhele udumo egijima kwi-Orlando Pirates uvumbuke kwiDabeka Sporting egijima kwiSafa KwaZulu-Natal ABC Motsepe League.
ILANGA lithole ukuthi iSporting inike ithuba lokujima uSolomon Mathe oqale ukugqama ebholeni edlala kwiPirates, kwiPlatinum Stars nakwiSuperSport United. Lo mdlali ubonakale kwiSporting ekuqaleni kwaleli sonto ezama inhlanhla yokuheha iso labaqeqeshi bale kilabhu eyenza kahle kwiMotsepe League.
Lezi zindaba ziqinisekiswe nguSunshine Ngwane ongumnikazi weSporting ebukeka izimisele ngokudlisa ngamapayipi amanye amakilabhu kule sizini. UNgwane uthe ngokwakhe ubona uMathe ezobasiza ikakhulukazi ngomzulwisano wesibili.
“UMathe ukhona ejimini kodwa konke kulele kubaqeqeshi, kasifuni ukubafaka ngaphansi kwengcindezi. Ungumdlali omuhle futhi onesipiliyoni esisidingayo. Okuhle ukuthi sizokuba nesikhathi eside naye ngoba iwindi lethu liyoze livulwe ngoMasingana (January) okuzosinika isikhathi esanele sokumcija ukuba qatha ngokwanele.
"Kule sizini sifuna ukunyukela kwiGladAfrica Championship yize kungeke kube lula kwazise izinga lamakilabhu liphezulu kakhulu,” kusho uNgwane.
Le kilabhu inabo abadlali abanesipiliyoni emabhukwini ayo kubalwa uSiboniso “Jomo” Gumede, uMthunzi Mlotshwa, uJabulani “Macokama” Nene ukukha nje phezulu.
Imidlalo yeSafa KZN ABC Motsepe League engempelasonto imi kanje:NGOMGQIBELO E-KK: Dabeka Sporting vs Muzi King Masters 13h00.
EGreytown: UMvoti FC vs Movers 15h00.
ESugar Ray Xulu: Milford FC 15h00.
EDarnall: Qwabe United vs GWP
Natal Rich Boys FC vs
Friends 15h00.
EPhoenix: Rainham Sporting vs Edendale Juventus 15h00.
EChatsworth: Summerfield Dynamos vs Durban FC 15h00. NGESONTO E-SJ Smith: Natal United vs Happy Wanderers 13h00.