UMJAHO WE-EAC OLWISANA NENGCULAZI
IYAQHUBEKA nokugqugquzela intsha ukuba iziphathe kahle nokuzithiba kwezocansi i-Ethekwini Athletics Club (EAC) kaMbhishobhi uVusi Dube okuzokuthi ngeSonto elizayo ibe nomjaho wejubane iHope Challenge and Abstinence Run ohlanganise i-10km ne-5km.
Lo mjaho uzosukela uphinde uphelele eRitson Campus (DUT) eThekwini kusuka ngo-6 ekuseni. Lo mjaho uhlelwe yi-EAC ngokubambisana neCentre of Hope okuyisikhungo sabantu abaphila negciwane lesandulela ngculazi (HIV). Kuthiwa inhloso yalo mjaho wukubhekana nezinto ezithinta intsha.
UNdukwenhle Zulu we-EAC, utshele ILANGA ukuthi balindele abasubathi abangaphezulu kuka-1 000. Uthe sekubhalise abangaphezulu kuka-400.
“Inhloso yalo mjaho wukugqugquzela intsha ukuba iziphathe kahle. Kuyasisiza kakhulu ukusebenzisana kwethu neCentre of Hope lapho kuqiniswa khona intsha ehaqwe yiHIV,” kusho uZulu.
Abafuna ukubamba iqhaza kulo mjaho bangalanda amafomu ezitolo zakwaPick ‘n Pay kulo lonke elakuleli kanti imingenelo izokwamukelwa ngosuku lomjaho. ILANGA lithole ukuthi le kilabhu seyinobudlelwano neFNB Durban 10km. Abafuna ulwazi ngalo mjaho bangashayela uZulu kwethi: 072 221 8784.
Omunye umjaho obhekiwe ngempelasonto yiGreater Edendale 10km Challenge exhaswe yiComrades Marathon. Lo mjaho uzokube ugubha iminyaka ewu-13 nonyaka kanti uzoqala eWadley Stadium uphinde uphelele khona. AbeComrades bathe kulo mjaho balindele abasubathi abangaphezulu kuka-2 000. Abafuna ulwazi ngawo bangaxhumana neCMA kwethi: 033 897 8650.
Abasubathi baseThekwini bazokhiphana inkani kwiBluff Marathon ngeSonto kusuka ngo-6 ekuseni eBluff. Ngolwazi ngalo mjaho kushayelwa kwethi: 083 625 3386.