Usizi kowaphucwa amawele esibhedlela
Uthi athathwa ngaphandle kwemvume yakhe, eqeda ukubeletha
AKASABUTHI quthu ubuthongo owesifazane wasePiet Retief, eMpumalanga, obelethe amawele amathathu ngo-2005 - amantombazane amabili nomfana oyedwa - kodwa kwagcina ngokuba odokotela ababembelethisa ePiet Retief Hospital, bemtshela ukuthi bazowathatha amadodakazi amabili ngoba bebona ukuthi ngeke akwazi ukuzikhulisa zonke lezi zingane.
ILANGA libe nengxoxo ekhethekile noNkz Makhosazane Lukhele (34), ongunina wala mawele, othi usehambe kwaze kwaguga izicathulo ezama ukuba izingane zakhe zibuyele kuyena.
Utshele leli phephandaba ukuthi ngesikhathi ethola lezi zingane, isimo sakhe sempilo sasingesihle, ebuthakathaka futhi engasebenzi.
Uthi esebelethile, odokotela bamkhombisa izingane zakhe ezintathu, kodwa bamtshela ukuthi bazozithatha ezimbili.
“Ngesikhathi kwenzeka lokho, ngangididekile ngenxa yokuthi isimo sami sempilo sasingesihle, baze bangidedela esibhedlela benganginikile izingane zami. Kwakunabahlengikazi ababelokhu beyikhuluma le nto, bethi kayilungile futhi kayikaze yenzeke.
“Ngabuyela esibhedlela ngemuva kwezinsuku ngiyozama ukulungisa le ndaba, ngatshelwa ukuthi izingane sebezitholele ikhaya lezintandane ezizokhulela kulona, bagcina benganginikanga igama lendawo ezigcinwe kuyona.
“Ngahamba ngaze ngakhathala, kwaze kwaphela nemali emaphaketheni. Ngigcine ngiyitholile indawo ezazigcinwe kuyona, okuthe uma ngifika khona bakuqinisekisa ukuthi bezikhona kodwa sezithole abazali abasha abazozikhulisa,” kusho yena.
Uthi uhambe waze wafika kulabo bazali, bakuqinisekisa ukuthi izingane kakuzona ezabo, bazithatha ekhaya lezintandane kodwa bangayingena eyokubambisana naye ukuze zibuyele kuyena.
Uthi enye ihlala eNgwavuma, useke wayibona ngamehlo baze baxoxa. Enye uthi ise-Ermelo, khona eMpumalanga, nayo useke wakhuluma nayo.
“Abazali” bayo bakuqinisekisa ukuthi akuyona eyabo, bayithola ekhaya lezintandane.
Uthi ngesikhathi efika ezinganeni, wafika waqinisekisa ngemikhangu ezazalwa nayo emhlane ukuthi ngezakhe ngempela. Uthi zontathu bezinemikhangu efanayo emhlane.
Utshele ILANGA ukuthi izingane kazinankinga nokuthi bayohlola amagazi ukuze zizoba nesiqiniseko sokuthi ngezakhe ngempela.
“Inkinga engibhekene nayo manje, kanginawo amandla okuyokhokhela odokotela ukuze kwenziwe ulibofuzo. Ngingajabula uma kungafika isikhathi sokuba ngidlule emhlabeni ngibe sengiyilungisile le nkinga, izingane zami zibe sezihlangene,” kusho yena.
Okhulumela uMnyango wezokuThuthukiswa koMphakathi KwaZulu-Natal, uMnu Mhlabunzima Memela, uthe bazolulandelela lolu daba, babheke ukuthi ngesikhathi unina wezingane ephucwa zona kwakulandelwe imigudu efanele yini.
“Kubalulekile ukuba kube nguye ozisholo ukuthi ufisa lokhu bese esho izizathu zokunikezela kwakhe ngezingane. Kubalukelile ukuba sibheke ukuthi noyise wezingane kwakukhulunyiwe yini naye ngaphambi kokuba kwenzeke konke lokhu. Nakho ukubandakanyeka kukadokotela kakuvumelekile ngoba akakwazi ukusho ukuthi unina wezingane ngeke akwazi ukuzikhulisa,” kusho yena.
Uqhube wathi bazoqinisekisa ukuthi kuba nosonhlalakahle ozolekelela lo mndeni ukuze usizakale, kuphinde kutholakale ukuthi izinkantolo nazo zazifakiwe yini ngesikhathi kwenzeka konke lokhu.
Uma kuwukuthi konke lokhu akwenziwanga, kuyobe kusho ukuthi kakukho semthethweni ukuhlukaniswa kwezingane, okungafaniswa nje nokuthi zishushumbisiwe.