Belula isandla osomabhizinisi
BAQHATHA izingwazi zikanobhutshuzwayo zaKwaZulu-Natal ngenhloso yokunxenxa ozakwabo ukuba baphonse itshe esivivaneni ukuze kutakulwe imindeni eyakhahlanyezwa yizikhukhula zangoMbasa (April) nonyaka osomabhizinisi abakhele iPinetown.
Kuzokhumbuleka ukuthi iKwaZulu-Natal izikhotha amanxeba ngenxa yesishingishane esidlule nemiphefumulo eNew Hanover ngoLwesibili nje, ngoMbasa kwaba nemvula eyadala izikhukhula ezakhipha imiphefumulo engaphezu kuka-60, zashiya abanye abantu bengenamizi.
Kuze kube yimanje kunemindeni engakaze iluthole usizo njengoba sekuphinde kwabuya ezinye izimvula ezizale isishingishane. Inhlangano ebizwa ngeMicro Zone Entertainment, ebunjwe ngosomabhizinisi basezindaweni ezakhelene nePinetown, kuvela ukuthi izoqhatha izingwazi zikanobhutshuzwayo emidlalweni ezokuba mhla ka-30 kwephezulu e-Anderson Park Sports Ground, ePinetown.
Kubadlali okubhekwe ukuba babeyingxenye yale midlalo, kubalwa uThanduyise “Gonondo” Khuboni obegijima kwiLamontville Golden Arrows nakwiBafana Bafana noMabhuti Khenyeza obedlala kumaZulu.
Le midlalo ididiyelwa nguVusi Mthembu weBrazil Academy yaKwaNdengezi, ongomunye wabaqeqeshi abahlonishwayo kulesi sifundazwe. Ekhuluma neLANGA ngoMsombuluko, ngesikhathi kuhanjelwe umndeni wakwaLembede, eMpola, eMariannhill nowakwaNzimande KwaSanti - khona eMariannhill - uMnu Nhlanhla Shelembe ongomunye wosomabhizinisi abahlonishwayo ePinetown, ophinde abe yisikhulu esiphezulu sakwaMicro Zone, uthe:
“Inhloso yethu ngokuqhatha lezi zingqungqulu wukunxenxa abanye osomabhizinisi ukuba baphonse esivivaneni ukuze sisize imindeni ekhahlanyezwe yizikhukhula.
“Into esithinte kakhulu wukuthi kuza uKhisimusi, sizobe sijabule nemindeni yethu kodwa kube kukhona imindeni ethwele kanzima, Siyacela nakwabanye osomabhizinisi nezinkampani ukuba balekelele,” esho.
UKhuboni ukuqinisekisile ukuthi uzoba yingxenye yale midlalo kanti nabanye ozakwabo bazokube bekhona.