INJABULO KWABE-IFP BAMUKELWA ELIMPOPO
UGQUGQUZELA ukuba kungalalwa kodwa kusetshenzwe kanzima ukulekelela umphakathi waseNingizimu Afrika wonke ngothi lwawo ngosizo oluzowenza uhambisane nezobuchwepheshe besimanje njengoba kungena “undamathiya” (4th Industrial Revolution) uMengameli we-IFP, uMnu Velenkosini Hlabisa.
Lokhu ukusho izolo ngeSonto engxoxweni yakhe neLANGA emuva kokuphothula uhambo lwezinsuku eziwu-5 lokuyolalela izinkinga zabantu eLimpopo, futhi abakhuthaze ukuba baqome i-IFP njengoba kuza ukhetho lohulumeni basekhaya ngo-2021, oluyolanywa ngolukazwelonke ngo-2024.
UMnu Hlabisa uveze ukuthi kabakholwanga yindlela abemukelwe ngezandla ezifudumele ngayo kulesiya sifundazwe. Kulolu hambo ubehambisana nobuholi obuphezulu be-IFP. Uthi ngesikhathi eqokwa ukuhola leli qembu ngoNcwaba (August) nonyaka, bazibekele umgomo wokuthi i-IFP igcwale iNingizimu Afrika yonke.
“Besiyovula amasango eLimpopo ukuze lesiya sifundazwe sibe yikhaya le-IFP. Sibonane nabantu ubuso nobuso, sahambela izindawo zasemakhaya ezahlukene, saya nasemadolobheni ukuzwa izinkinga ezibhekene nabantu bakithi.
“Bakhale ngokugqoza kwamathuba emisebenzi, wudlame olubhekiswe kwabesifazane nezingane kanti osomabhizinisi bakhale kakhulu ngobugebengu obuphazamisa amabhizinisi abo. Abanye sebecabanga nokuwavala amabhizinisi ngenxa yobugebengu,” kusho uMnu Hlabisa oke waba yimeya yaKwaHlabisa ngekhadi layo belu i-IFP. Uthi abanye abantu bakhale ngokuthi ukuhlinzekwa ngezidingongqangi kusezingeni eliphansi ngendlela emangalisayo komasipala bakulesiya sifundazwe njengoba kunezindawo osekuphele izinyanga izakhamizi amanzi ziwezwa ngendaba.
“I-IFP njengeqembu lezixazululo, elingaphili ngokugxeka, sishiye abaholi bethu baseLimpopo - kwazise kasinawo amakhansela khona - ukuba basebenze lezi zinkinga.
“Abantu bakuthakasele kakhulu ukufika kwe-IFP abayibone njengethemba labo, kwazise abanye besebethi ngeke besavota ngenxa yokuthi uhulumeni weqembu eliphethe omasipala nesifundazwe ubenzela phansi. Uhulumeni wanamuhla kawubalaleli abantu, uze usukume ngoba nakhu sebebhikisha,” kusho yena.
Mayelana nezakhiwo ezaziwusizo ngesikhathi sikahulumeni waKwaZulu, esezaphenduka iziduli ngenxa yokungasetshenziswa, ezinye sezalinyazwa, uthe: “Ukuze kwenziwe umehluko, kuvuswe nezakhiwo ebeziwusizo phambilini - ukuze zisize umphakathi njengoba zazakhelwe lokho - isixazululo wukuvotela i-IFP ngo-2021.
“Sizobanxenxa futhi abantu ukuba bavotele leli qembu ngo-2024 ukubuyisa iKwaZulu-Natal,” kusho uMnu Hlabisa.
Izindawo ezivakashelwe yi-IFP kulolu hambo oluqale ngoLwesithathu lwaze lwaphela izolo ngeSonto, kubalwa iPolokwane, Thohoyandou, Tzaneen noMasipala wesiFunda iSekhukhune.