UMNDENI UDIDEKILE KUBULAWA ILUNGU LAWO
UTHUKA izanya umndeni wakwaButhelezi eNtembisweni, eMatimatolo, emuva kokudutshulwa kubulawe ilungu lawo phambi kwengane yalo eneminyaka emithathu nonina wayo.
Kubikwa ukuthi uMnu Sabelo Buthelezi (24) udutshulwe engena egunjini lakhe lokulala washonela khona lapho.
UNkz Mabusi Mbeje, onguyisekazi kaMnu Buthelezi, uthi bewumndeni basadidekile ukuthi ubulaweleni.
“Le nto yenzeke ngezithuba zabo-12h00 ebusuku, ubebuya esitolo. Kuthe uma engena endlini, kwaba khona umuntu odudula isicabha wamdubula. Namanje sisadidekile, kasazi ukuthi ubulawelweni,” kusho yena.
Okhulumela amaphoyisa KwaZulu-Natal, uCapt Nqobile Gwala, uthi kuvulwe icala lokubulala kanti kayikaziwa imbangela yokubulawa kukamufi.
* Khonamanjalo, sekuqubuke indida ngezidumbu ezimbili zezithandani ezitholakale ezindaweni ezahlukene izolo ngeSonto zinamanxeba okudutshulwa.
Kubikwa ukuthi isidumbu sikaNkz Zinhle Ngcobo (30) sitholwe budebuduze nasemzini wakhe KwaSawoti, eMzinto, akuphelanga sikhathi esingakanani kwatholakala esesinqandamathe sakhe, uMnu Kreeson Kassemath, eziMbokodweni.
Akucaci ukuthi babulawe ngubani nanokuthi babulawa nje bekwenzenjani.
UCapt Gwala uthi likhona icala elivuliwe emuva kokuba isidumbu sowesifazane oneminyaka ewu-30 sitholwe sinenxeba lokudutshulwa emhlane.
Ukuqinisekisile nokutholwa kwesidumbu sowesilisa sisemotweni, sinamanxeba okudutshulwa ekhanda.
Uthi akuthathwanga lutho emotweni kamufi kanti amaphoyisa aKwaMakhutha asaphenya.