Iya kubantu i-NSFAS
Inhloso wukufinyelela ezindaweni zasemakhaya
NJENGOBA sezihubela sakusha ngosuku lokuvalwa kokubhalisela uxhaso lweNational Student Financial Aid Scheme (NSFAS) kubafundi abaya ezikhungweni zemfundo ephakeme ngonyaka ozayo, abalesi sikhwama bazovakashela izindawo okuqhamuka kuzona abafundi okufanele ngabe bayabhalisa kodwa abangakwenzile lokho.
Inhloso yalokhu kuvakasha wukufinyelela ezindaweni zasemakhaya, ezinye zazo imiphakathi yazo okunzima ukufinyelela ezindaweni ezinikezela ngezidingo zempilo, nokubhekisisa izindawo ezinabafundi abayimbijana abafake izicelo zalolu xhaso, njengoba kuvalwa ukubhalisa mhla ka-30 kuLwezi (November) nonyaka.
Ngokujwayelekile, izisebenzi zeNSFAS ziye ziphume inqina ezweni lonke kusukela ngoMandulo (September) - zibheke kakhulu ezindaweni zasemakhaya komasipala abancane nabezifunda - ziyonikezela ngolwazi kulabo okumele babhalisele lolu xhaso.
Konke lapho zihamba khona, ziluleka abafundi ngendlela elandelwayo uma bebhalisa, ziqinisekise amaphepha abafake ngawo izicelo, zisize bonke ababhalisayo ukuba bakwazi ukusebenzisa ikhompyutha nokubhalisa online.
“Ngeke sakushalazela ukuthi kunokungalingani emiphakathini yethu, ngakho-ke uhulumeni udinga ukusukuma uyise izidingo emiphakathini,” kusho uDkt Randall Carolissen weNSFAS.
Ubekhuluma ngoMgqibelo ngaphansi kukaMasipala wesiFunda uGu ohambweni obeluhlelwe yi
Lynette and Peter Zwane Foundation esebenzisana nalesi sikhwama. I-NSFAS yamukele izicelo eziwu-348 240 iNingizimu Afrika yonke; KwaZulu-Natal ziwu-100 130, eGauteng ziwu-70 919, eLimpopo ziwu-54 601 ukubala izifundazwe ezimbalwa ezihamba phambili ngezicelo ezizifakile.
Bawu-1001 kuphela abaphila nokukhubazeka abafake izicelo. Abafundi abangenawo amakhompyutha noma omakhalekhukhwini besimanje, bangaya emahhovisi eNational Youth Development Agency (NYDA) aseduze, emitapweni yolwazi, ( local libraries), eGovernment Communication and Information System (GCIS) Thusong Centres ezweni lonke. Emasontweni amabili ezayo, izisebenzi zeNSFAS zizobe zichithwe kuzo zonke izifundazwe.