Ukubaluleka kokuhamba
NJENGOBA sekusondele isikhathi samaholide kaKhisimusi, iningi labantu ebelizikhandla unyaka wonke emsebenzini, lisuke limagange ngokuphumula nokunikeza imizimba ithuba lokuhlumelela ngamandla amasha okulungela unyaka olandelayo.
Kwabanye leli yithuba futhi lokuzithokozisa ngezidlo ezimtoti, kangangoba abanye baze beqe nemiyalelo yodokotela ngezinhlobo zokudla ezingaba yingozi empilweni yabo.
Ngenxa yokuthi leli phephandaba likhathalele abafundi bawo wonke amazinga ezomnotho, kumqoka ukuba ligcizelelwe iphuzu elithi kungcono ukuvikela izifo zingakahlaseli kunokuzelapha uma umuntu esehlabekile.
Ngakho-ke kwelanamuhla kule ngosi sibheka enye yezinto eziwusizo futhi ezingakhokhelwa mali, ezingalekelela ekubeni sihlale siyimiqemane. Lapha sisho ukunyakazisa umzimba ngokuhamba.
Ngokombhalo wephephabhuku lezempilo iHealthline, ukuhamba kuhlomulisa ngezindlela eziningana kubantu bezigaba zonke zokukhula ukuze bahlale bephila kahle. Kuthiwa ukuhamba kusiza kangangoba ezinye izifo ziyagwemeka ngakho.
Ukuhamba akubizi mali, kunjalo nje kulula ukukushutheka phakathi kohlelo lwezinto ozozenza usuku nosuku. Kuphela okudingeka ube nakho ukuze uwuqale lo mkhuba, wukuthola izicathulo zokuhamba noma zokugijima ezisezingeni elihle. hlwa) kuwenza kahle lo msebenzi ukudlula ukuhamba imizuzu ewu45 ngezinye izikhathi zosuku.
Ukuhamba kuyasiza ekuvikeleni amalunga amathambo njengamadolo nasemanyongeni. Lokhu kungenxa yokuthi kuwagcoba ngoketshezi futhi kuqinise nemisipha yawo. Ukuhamba kulekelela labo abanesifo samathambo ngokunciphisa izinhlungu. Ukuhamba ibanga eliphakathi kuka-8km no-9.6km esikhathini esiyisonto kuyasivimba isifo samathambo.
Ngenxa yenkinga yezokuphepha kule mihla esiphila kuyona, kumqoka ukuqikelela ukwenza lokhu okulandelayo ukuze uhambe ngokuphepha:
Hamba endaweni elungiselwe abahamba ngezinyawo. Qiniseka ukuthi kuba yindawo ekhanyayo ngokwanele;
Uma uhamba sekuhwalele noma kusempondozankomo, yembatha izinto ezikhanyayo ukuze abashayeli bezimoto bakubone;
Gqoka izicathulo eziqinile ezinesithende nendawo yamathe onyawo eyeseka unyawo lwakho; Gqoka impahla ekuxegayo; Phuza amanzi ngaphambi kokuqala ukuhamba, nalapho uhamba ukuze umzimba uhlale unamanzi;
Gcoba umzimba ngomuthi wokukuvikela elangeni, empeleni lokhu kwenze namhla linamafu.