I-IFP KUMELE IVIKELE IZITHUKUTHUKU ZAYO KWAZULU-NATAL
MHLELI: I-IFP sekumele isukume ivikele izinhlaka zesizwe ezaphembeka ebuholini bayo. Izinhlaka eziningi zicekeleka phansi, ezinye ziyashabalala, ekubeni ziyadingeka emphakathini!
Ziqedwa ngesihluku yize lingekho elinye ithemba lokuvala isikhala sazo. Ziningi izizathu ezidala lokhu, phakathi kokunye ezinye izizinda zentuthuko ezahlelembeka ebuholini beNkatha, ziqedwa wukuntuleka kwamakhono ebuholini obukhona, ngakolunye uhlangothi ezinye zishabalala ngenxa yomhobholo.
Mhlawumbe kuhle sibalule ezimbalwa izinsika zempilo eziya ngokufadalala ezandleni zeqembu elibusayo, i-ANC: Yimboni yezolimo namahlathi; Ezokongiwa kwemvelo; Ezempilo; Ezemfundo; Nezokuphepha komphakathi. Bengicela sibuke eduze lezi zihloko ezilandelayo:
INkatha yasebenza umsebenzi omkhulu esifundazweni ngokuthuthukisa ezolimo namahlathi. Ezolimo zasiza ukondla izindibane zabantu ezweni kanti ezamahlathi zaphetha ngokusungula imishini yokukhiqiza amapulangwe, kwadaleka namathuba emisebenzi ezweni lakithi. Ngaphansi kweqembu elibusayo namuhla, yonke le nto yacekeleka phansi, kwafiphala namathuba amatoho esizweni nomphangazana waxhuma eduze, kwadlondlobala indlala emakhaya.
Ezokongiwa kwemvelo zazisezingeni lomhlaba njengoba iziqiwi zasungulwa nguMntwana waKwaPhindangene ezingxenyeni eziningi zesifundazwe, kwaqeqeshwa inqwaba yabantu kwezokongiwa kwemvelo.
Amahhovisi ezokuphatha akhiwa eduze nalezi zikhungo ukuze zilawuleke kahle ngabaphathi beseduze nazo, kodwa iqembu elibusayo layidicilela phansi yonke le nto.
Kwathuthwa namahhovisi, kwazingelwa ngokungemthetho maqede kwabhuqwabhuqwa kwasani oluyinyamazane eziqiwini, ungafunga ukuthi kwamane kwagasela isikhonyane esinamandla sashaya saqothula yonke into eyimpunzi eziqiwini!
Kuyihlazo esikubona ezibhedlela zakulesi sifunda njengoba zonke ziswela imibhede, abantu balala emabhentshini namakhambi awenele ukubhekelela impilo yabantu.
Ezemfundo kunezinkinga ezidida ukwenza njengoba abazali nothisha besala bekhungathekile ngenxa yokushoda kwezinsizakusebenza, ukuntuleka kophahla. Nokutshalwa kothisha ngokwenzelela ngenye yezinto ezikhinyabeza umsebenzi.
Lona ngomunye umnyango olengela eweni ngenxa yokugxambukela kwezombusazwe kuwona. Lolu hlaka seluphethwe njengezinhlaka zeqembu lezombusazwe, okuyinto ebucayi esikhathini esizayo.
Sibheke esikhathini lapho abantu bengeke besalibona iphoyisa, bezobona usopolitiki, osekuyosho ukushabalala kwengalo yomthetho ngoba abombutho sebaxoviswa udaka lwezombusazwe, okuzothunaza isithunzi sabo.
Nonhlakanipho Shinga
ABATHWEBULI Sabelo Masuku masuku@ilanganews.co.za John Hlongwa hlongwaj@ilanganews.co.za
UMHLELI WEZEMIDLALO Zakhele Mchunu zakhelem@ilanganews. co.za
IZINTATHELI ZEZEMIDLALO Senzo Sokhela senzos@ilanganews.co.za Mzwamandla Zondi zondim@ilanganews.co.za Mfanafuthi Ndlovu mfanafuthin@ilanganews.co.za Philani Ncalane philanin@ilanganews.co.za
UMHLELI OMKHULU Philani Mgwaba philani@ilanganews.co.za