Imenenja ye-Eagles ikhala ngokungaholi
Ishiye umsebenzi yathi izobuya uma isiholelwe
IDINSILE umsebenzi imenenja yeRoyal Eagles egijima kwiGladAfrica Championship ikhala ngokungaholelwa. I-Eagles izobhekana neJomo Cosmos koweGladAfrica Championship ngoLwesithathu ngo-15h30 e-Olen Park Stadium, ePotchefstroom.
ILANGA lihletshelwe yimithombo yalo engaphakathi kwi-Eagles ukuthi uSakhiwo “Mabhida” Mhlongo obesenyuselwe kwesokuba yimenenja kule kilabhu, kuvela ukuthi akasalubhadi emsebenzini ngenxa yokuthi akaholelwe.
Leli phephandaba lishayela uMhlongo ngalolu daba, uthe akanyamalele uzobuyela emsebenzini uma uSbusiso Mpisane ( osesithombeni) ongumnikazi wale kilabhu esemholele.
“Ibuhlungu inhliziyo yami ngale nto ngoba bengiwa ngivuka neEagles kodwa ekugcineni angiholelwa.
"Angazi ukuthi uMpisane uyenziswa yini le nto ingizwisa ubuhlungu.
"Imoto yami ayikhokhelwe kule nyanga, izingane azikhokhile esikoleni ngenxa yokuthi angiholile.
"Okubuhlungu le moto engakhokhile ibiyenza yonke imisebenzi yekilabhu.
"Ngeke ngikwazi ukusebenza mahhala, uma esengiholele ngizobuyela emsebenzini.
"Ngike ngifikelwe yizinyembezi uma ngicabanga lapho esisuka khona nale kilabhu njengoba ngingasaholelwa.
"Ngisazimisele ukusebenzela ikilabhu kodwa kufanele baqale bangiholele kuqala,” kusho uMhlongo obezwakala ukuthi uphatheke kabi.
Imizamo yokuthola uMpisane ukuba aphawule ngalolu daba iphunzile njengoba ucingo lwakhe belukhala kodwa lungabanjwa.