UMTHEMBU UZOBA YINXUSA LE-JOSIAH GUMEDE MARATHON
UQOKWE njengenxusa leJosiah Gumede Marathon ehlanganise ne21km no-10km uBongumusa Mthembu oyingqwele yeTwo Oceans Marathon kanti ungene isibili kwiComrades Marathon yanonyaka.
IJosiah Gumede Marathon izokuba ngoMgqibelo isukela eMazizini isongwe eBergville Sports Centre. Lo mjaho kuzokube kungowesibili nonyaka wasungulwa kanti inhloso yawo enkulu wukugqugquzela umphakathi wasemakhaya ukuba ubambe iqhaza kwezemidlalo.
Ukuqokwa kukaMthembu njengenxusa lalo mjaho kuqinisekiswe nguSipho Ndaba ongomunye wabadidiyeli balo mjaho. UNdaba utshele ILANGA ukuthi baqoke uMthembu njengenxusa lalo mjaho ukuze bakwazi ukuheha abasubathi abaningi kuwona.
“Nyakenye besinabasubathi abangaphezulu kwenkulungwane kanti nonyaka silindele abangaphezulu kuka-5000. Okusijabulisa kakhulu wukuthi iKwaZulu-Natal Athletics (KZNA) ithe umjaho wethu wanonyaka owokuzibekisela indawo kwiTwo Oceans nakwiComrades Marathon ngokwehlukana.
“Kulo mjaho silindele izikhulu eziningi zikahulumeni njengoba sizokube sihlonipha uJosiah
Gumede obengumengameli weANC. Okunye okuhle ngalo mjaho ukuthi indawo yaseBergville ingenye yezindawo eziphethe umnotho wesifundazwe iKwaZulu-Natal futhi ezinobukhazikhazi okuzokwenza abazobamba iqhaza baphindele emakhaya bengawuvali umlomo.
"Lo mjaho ngowokuthuthukisa indawo yaseBergville nokukhombisa ngobukhazikhazi bayo,” kusho uNdaba.
UNdaba uqhube wathi ucela umphakathi ukuba uphume ngobuningi bawo ukuzobamba iqhaza kuwona. Uthi abangakwazi ukwenza iMarathon bangenza i-21km noma i-10km.
Uthi bazovala namuhla ngoMsombuluko ukwamukela imingenelo. Uthi abasubathi abangenayo indawo yokulala bazohlelelwa indawo bese bethathwa ekuseni bayiswe lapho kusukela khona umjaho.
Izingqwele zalo mjaho zizohlomula ngo-R20 000 kubo bobubili ubulili kwiMarathon ohambisana nemithobanhliziyo yezikibha nezindondo.
Uphethe ngokuthi abasubathi abangakabhalisi bangaya ezitolo zakwaPick n Pay bayofuna imingenelo noma bangene kwi- website ethi: www.eventtiming.co.za. Ngolunye ulwazi kushayelwa uBarry enombolweni ethi:0325863822 noma uNdaba kwethi: 078 901 9997.