LUHLOMA NGABANOHLONZE UTHONGATHI
ANGASE aqale namuhla ngoMsombuluko uThanduyise “Gonondo” Khuboni ukujima kuThongathi FC olunomdlalo omqoka weGladAfrica Championship neTshakhuma Tsha Madzivhandila ngoLwesithathu ngo-15h30 ePrincess Magogo Stadium, KwaMashu.
UThongathi FC luya kulo mdlalo izinto ziluvuna kwazise lusesicongweni ngamaphuzu angu-25.
UJohnny Ferreira ocija uThongathi exoxa neLANGA izolo ngeSonto, uvumile ukuthi uzonika lo mdlali ithuba lokujima nale kilabhu. Uthi uKhuboni ucele ukujima nabo ngenxa yoku-thi akanakilabhu okwamanje. Uthi naye ubona lo mdlali engabasiza emzuliswaneni wesibili weligi njengoba ubukeka uzokuba nzima kakhulu.
“Omunye umdlali okhona ejimini nguS’duduzo “Sdu” Dlamini osuka kumaZulu FC engisazoguqa phansi ezikhulwini zekilabhu ukuba zimsayinise ngenxa yekhono analo. Indlela avutha ngayo ejimini iyangichaza. Ngenhlanhla enkulu ngiyamazi esadlala kwiThanda Royal Zulu ngakho-ke uzosisiza uma ubheka uhlobo lwabadlali esinabo.
“Amalungiselelo alo mdlalo ahamba kahle, kanti kumqoka ukuthi siwunqobe ngoba uyingxenye yemidlalo esisele ngayo kwamanye amakilabhu. Sibe nesikhathi esihle sekhefu ukuhlanganisa ikilabhu esizogadla ngayo.
"Sibe nemidlalo yesihle ngeledlule neMaritzburg United saphinde savala ngamaZulu FC okwenze abadlali bami baba qatha ngokwanele. Ngiyazi ukuthi iTshakhuma FC iza ngolaka kodwa ekhaya kasigayelwa mphako. Lo mdlalo kimina usufana nokuthi siqala kabusha isizini ngoba yonke eyedlule kangisayibali. Okunye wukuthi ngiya kulo mdlalo nesikwati esiqinile kwazise bonke abadlali bafuna ukuba yingxenye yomdlalo.
"NoXolani Slawula useqalile ukujima nekilabhu yize ngimnike isikhathi esincane ngesikhathi semidlalo yobungani,” kusho uFerreira. Uqhube ngokuthi uyasiqonda isimo esibhekene neTshakhuma FC kwazise isanda kulahlekelwa ngumqeqeshi.
Imidlalo yeGladAfrica Championship imi kanje: NGOLWESITHATHU E-Olen Park: Jomo Cosmos vs Royal Eagles 15h30.
EPrincess Magogo: UThongathi FC vs Tshakhuma Tsha Madzivhandila 15h30.
EKameelsrivier: TS Galaxy vs Richards Bay FC 15h30.
Imiphumela yeSafa KZN ABC Motsepe League ihambe kanje:Natal 1, Wanderers 2; Dabeka 2, Muzi 1; UMvoti 2, Movers 0; NRB 0, Milford 0; Qwabe 1, Friends 2; Rainham 1, Juventus 0; Dynamos 1, Durban 1.
Kuzo ezakulesi sigaba, munye umdlalo okhona kusasa ngoLwesibili kwiSafa KZN ABC Motsepe League ngowe-X1 Experience ezobhekana neZululand Warriors FC ngo-15h00 eMkhomazi.