Ufisa ukuyeka ibhola ekwi-Arrows
Uveza okumenze wanyamalala ebholeni elikhokhelayo
UDALULA isizathu esenze wanyamalala ebholeni uThanduyise “Gonondo” Khuboni (33) ozakhele udumo egijima eqenjini lesizwe lakuleli iBafana Bafana nakwiLamontville Golden Arrows abengukaputeni wayo.
UKhuboni olihlikihla esiswini, ugcine ukubonakala ebholeni lakuleli egijima kwiHighlands Park kumasizini amabili edlule.
Selokhu eshiye kwiHighlands ubengakaze abonakale ndawo futhi bekungacaci noma useliyekile yini ibhola noma cha.
Engxoxweni uKhuboni abenayo naleli phephandaba emcimbini obekuhlangene kuwona osomabhizinisi abasebancane basePinetown, abaphume umkhankaso wokusiza labo abapheshukelwa yimizi ngesikhathi sezikhukhula zangoMbasa (April), lo mdlali uveze isizathu esenze wanyamalala isikhathi eside ebholeni.
UKhuboni oyinxusa lalaba osomabhizinisi ababizwa ngeMicro Zone Entertainment, uthe: “Emuva kokuba ngishiye kwiHighlands ngihlaselwe yizinkinga ezinkulu ezithinta isintu ngaphoqeleka ukushiya ebholeni, ngayozilungisa.
"Bekunzima ngoba lezi zinto bezingenza ukuthi konke engikusebenzele kushabalale.
“Sengizilungisile manje, sengikulungele ukubuyela ensimini. Ngisesimweni esihle sokudlala, engikucelayo nje yithuba, kakukhathalekile ukuthi yikwiGladAfrica Championship noma yikwiAbsa Premiership. Yinqobo nje uma ngizobuyela ensimini.
Ngizizwa ngisengawagijima amasizini amabili kuya kwamathathu ngendlela engiyiyona,” kusho uKhuboni.
Limbuza leli phephandaba ukuthi njengoba kuba nzima ngakwezomnotho kwabanye abadlali uma beke bathi ukuqhela ebholeni, sinjani isimo sakhe, uthe: “Isimo sami ngalapho sihle ngeke ngikhulume amanga. Into engisizile wukuthi ngesikhathi ngisadlala ngihlangane nabantu abangicebise ngendlela eseqophelweni eliphezulu yokulondoloza imali.
“Ngenhlanhla-ke futhi izinto zami ezimqoka kazikweleti. Umuzi wami oseDurban North kudala ngaqeda ukuwukhokhela. Yimoto yami yohlobo lweVW Golf 6 GTI kayisakhokhi. Njengamanje ngimatasa nebhizinisi lezindlu, ngiyazithenga ngizilungise ngizidayise, kokunye ngithenge iziza ngakhe ngidayise.
“Yibhizinisi elingenamsindo leli futhi liyangiphilisa. Okungiphethe kabi nje emoyeni wukuthi isifiso sami kasikafezeki sokuyeka ibhola ngidlala kwiArrows okuyiyona engivulele ithuba lokudlala esigabeni esiphakeme. Ngike ngakhuluma nosihlalo wayo uMato Madlala kodwa kasaze sayi-qeda inkulumo yethu,” kuphetha uKhuboni.