KUNEZINGUQUKO EZIMQOKA EMJAHWENI KAMTHEMBU
INGQWELE yeTwo Oceans Marathon uBongumusa Mthembu ihlelele abasubathi iTraining Run yebanga lika-60km ezokuba ngeSonto lomhla ka-22 kuZibandlela (December) isukela eBulwer isongwe eMpendle.
Lo mjaho uzoqala ngo-6 ekuseni kanti isikhathi sokuvalwa kuzokuba u-13h00.
Lo mjaho uzokube ugubha unyaka wesithupha wasungulwa kanti kubhekwe ukuba ungenelwe ngabasubathi abaningi abahlonishwayo bakuleli ngenhloso yokuziqeqeshela iTwo Oceans neComrades Marathon yangonyaka ozayo.
Lo mjaho kaMthembu ungomunye wenezinselelo ezinzima njengoba unezintaba eziwu-5 eziqwalwayo.
UXolani Mabhida ongumqeqeshi kaMthembu, ukuqinisekisile ukuthi lo mjaho uzokuba khona nanonyaka. Lo mjaho phambilini ububa ngesonto lokugcina kuZibandlela. UMabhida uthe nonyaka banqume ukuwusondeza kwazise ekupheleni kukaZibandlela abagijimi abaningi basuke sebegodukile.
Uthi lo mjaho uzosiza kakhulu abasubathi abafuna ukubamba iqhaza kuma-Ultra Marathon ngonyaka ozayo.
“Lo mjaho sizoqhubeka nokuba nawo minyaka yonke ngenhloso yokusiza abasubathi ukulungiselela imijaho yangonyaka ozayo. Umsubathi ozokwazi ukugijima kahle kulo mjaho kangingabazi ukuthi angakwazi ukwenza kahle emijahweni yangonyaka ozayo. Ngakho-ke ngimema bonke abasubathi ukuba bazobamba iqhaza kule training run,” kusho uMabhida.
Uqhube wathi ngomhla ka-8 kuZibandlela kuzokuba neTraining Camp ezosongwa mhla ka-22.
Le khempu izokuba seYMCA eMgungundlovu.
Uthe uzokwamukela bonke abasubathi kusuka kwabenza i-track kuya emabangeni amade.
“Ngizokwamukela kuphela abasubathi abawu-70 kanti kumanje sekubhalise abawu-29. Empeleni baningi nabanye abakhombise ukuba nentshisekelo yekhempu.
"Umuntu ozokuba yingxenye yayo uzothola ulwazi olunzulu, oluzomsiza ukugijima noma yimuphi umjaho ngonyaka ozayo,” kusho uMabhida.
UMabhida uthi imali yokujoyina wu-R1000 ohlanganisa imali yokudla nendawo yokulala. Uthi umsubathi kufanele aqinisekise ukuthi uphatha izinto zokuziqeqesha ezanele ukumelana nesimo sezulu.
Abafuna ulwazi ngeTraining Run kaMthembu bangaxhumana noThuso Mosiea kwethi: 083 395 0547 kanti abazimisele ngokuya kwikhempu bathintana noMabhida kwethi: 079 806 7205.