IPirates engcupheni yokushiywa uLorch
Kuthiwa kunamakilabhu ase-Europe amfunayo
ISENGCUPHENI yokulahlekelwa ngumdlali omqoka i-Orlando Pirates ezingakahlangani kahle izinto zayo ngaphansi kobuholi bukaRhulani Mokwena ongumqeqeshi.
UThembinkosi Lorch odlala esiswini kwiBucs uqokwe njengomdlali ovelele wePremier Soccer League (PSL) ngesizini eyedlule emuva kokuba eshaye ingcwenga yebhola.
Bekubhekwe ukuba alibhekise e-Europe njengoba kwenzeke kubadlali abanjengoPercy Tau noLebogang Manyama abalibhekise e-Europe emuva kokunqoba lo mklomelo wePSL.
Leli phephandaba lithole ukuthi uLorch kungenzeka ayishiye iBucs ngoMasingana (January) njengoba kunekilabhu yakwa-Israel neyaseBelgium okuthiwa ayamfuna.
Kuthiwa aseke ayithinta iBucs kodwa azikakaqalwa izingxoxo.
Leli phephandaba lishayela u-Irvin “Iron Duke” Khoza ongusihlalo weBucs ngalolu daba, uthe: “Ngeke ngikwazi ukuphawula ngalolu daba, angiphawuli ngezinto ezingakenzeki.
"Uma kukhona okwenzekayo ngizonazisa.
"Into emqoka kimina njengamanje wukubona iPirates iqala inqoba.
"Kodwa-ke asitatazeli, engikucelayo kubalandeli wukuba behlise imimoya sisazowaphendula amatafula. Ake sinike umqeqeshi ithuba enze umsebenzi ngaphandle kokuphazamiseka,” kusho uKhoza.