UKHATHAZWA YIGEBE UMQEQESHI WE-PIRATES RESERVES
UZIBEKELE umgomo onzima uNjabulo “Stoppa” Blom oyisitobha seKaizer Chiefs ehambela phezulu kulezi zinsuku njengoba izihola phambili kwi- log ye-Absa Premiership futhi isanda kwehlula izimbangi zayo ezinkulu i-Orlando Pirates amasonto elandelana.
Lo mdlali ubeyingxenye yeKaizer Chiefs Reserves ehlulwe yiOrlando Pirates Reserves ngo-1-0 emdlalweni weMultiChoice Diski Challenge (MDC) ngoMgqibelo eDobsonville Stadium, eSoweto.
UBlom uthi uzibekele umgomo wokuqinisa indawo yakhe esikimini esikhulu seChiefs, ukunqoba inkomishi ye-Absa Premiership nale kilabhu nokubhekisa amabombo e-Europe.
“Ngijabule kakhulu ngokunikwa ithuba esikimini esikhulu, futhi ngeneme ngendlela engiqhuba ngayo. Nokho-ke okumqoka kakhulu kimina wukunqoba inkomishi yeligi neChiefs. Sibophele inqwaba yabadlali bezinga eliphezulu engikholwa wukuthi isipiliyoni sabo singasisiza ukunqoba iligi.
"Sinabadlali abaningi abadlalela amazwe ahlukene. Njalo babuya nolwazi oluthuthukile nxa kade beyomela amazwe. Angiboni kukhona okungasivimba ukunqoba iligi ekubeni sinabadlali abafana no-Eric Mathoho, uLebogang Manyama noKhama Billiat abanesipiliyoni semidlalo yamazwe,” kusho lo mdlali odabuka khona eDobsonville.
Uthi imimoya iphezulu kakhulu ekhempini yeChiefs ngemuva kokuhlula iPirates kabili amasonto elandelana.
“Ngabe ngiqamba amanga uma ngingathi ukuhlula iPirates akusikhuthazanga. Umdlalo womkhaya usho lukhulu kubona bonke abadlali.
"Imimoya iphezulu kithina sonke ngemuva kokwehlula iPirates kabili kulandelana. Nokhoke imiqondo yethu kufanele igxile kakhulu kwi- semi final yeTelkom esizoyidlala neMaritzburg United.
"Kufanele sinqobe lo mdlalo bese sidlulela kowamanqamu, nawo okufanele siqinisekise ukuthi siyawunqoba. Angingabazi ukuthi ukunqoba iTelkom kungaholela ekutheni sibe yizingqwele ze-Absa Premiership ekupheleni
UKHATHAZWA yigebe elivulwa yiMamelodi Sundowns Reserves uGlen Salmon ocija i-Orlando Pirates Reserves ehlule iKaizer Chiefs Reserves ngo-1-0 koweMultiChoice Diski Challenge (MDC) ngoMgqibelo ntambama eDobsonville Stadium, eSoweto.
IDowns Reserves izenzele umsebenzi waba lula kule ligi inenebula iSuperSport Reserves ngo-6-3 koweMDC ngawo uMgqibelo.
Lokhu kwenze iDowns Reserves yaqhubeka nokuqhwakela kwi- log ngamaphuzu angu-35 emidlalweni engu-14.
IBidvest Wits Reserves iphefumula kanzima emhlane weSundowns Reserves njengoba inamaphuzu angu-34 emidlalweni engu14. IWits Reserves inenebule iHighlands Park Reserves ngo-4-1 koweMDC ngoMgqibelo eMakhulong Stadium, eTembisa. IPirates Reserves isendaweni yesithathu kwi- log ngamaphuzu angu-27 emidlalweni engu-14. Isele ngamaphuzu angu-8 kwiSundowns Reserves.
Leli gebe yilona elenza aphithanelwe yikhanda uSalmon. Uthi kubukeka kuzokuba nzima ukuvala leli gebe eselivulwe yiSundowns Reserves.
“Sitshinge inqwaba yamaphuzu kungenasidingo emidlalweni edlule. Siyawakhalela manje lawo maphuzu ngoba izimbangi zethu ziyaqhubeka nokubutha amaphuzu emidlalweni yazo. Eqinisweni nje, ngokwezibalo sisekhona embangweni kodwa nxa kubhekisiswa kahle, kasisenalo ithuba lokunqoba.
"Besibheke ukuthi iHighlands Park Reserves neSuperSport Reserves bazosenzela umsebenzi ngokusibambela izimbangi kodwa kwanhlanga zimuka nomoya njengoba nawo la makilabhu eguqile.
"Sesilindele ukuthi kube khona okuqhuzula iSundowns Reserves neWits Reserves. Inkinga badlala kahle futhi bathola imiphumela egculisayo.
"Nokho-ke okuhle wukuthi siyaqonda ukuthi amaphutha enzeke kuziphi izindawo. Abadlali bethu benze amaphutha amabi kakhulu emidlalweni edlule okuyiwona asifake kule nkinga. Okuhle wukuthi basebancane laba badlali ngicabanga ukuthi kuningi asebekufundile manje,” kusho lo mqeqeshi oke wacija iWits Reserves.
Uthi bakujabulele kakhulu ukuhlula iziMpofana njengoba zisanda kwehlula isikwati sabo esikhulu.
Uthi kube kuhle ukuthi basheshe bazibuyise izinduku kwiChiefs. IziMpofana zihlule iBucs ngo-3-2 kowe-Absa Premiership, kanti ngaphambi kwalokhu beziwashise iBucs ijezi kwiTelkom Knockout, eThekwini.