IChiefs ibambe umoya ngabadlali
UBartlett ucacisa nangamathuba okunqoba isicoco seligi
IBAMBE umoya ngabadlali abebemele amazwe iKaizer Chiefs ngaphambi komdlalo omqoka we- semi final yeTelkom Knockout ezowugijima neMaritzburg United ngeSonto ngo15h00 eMbombela Stadium, eMpumalanga.
UShaun Bartlett ongumsizi ka-Ernst Middendorp ocija iChiefs, uthi bamincele ukuthi babuye beyimiqemane bonke abadlali babo abebebizelwe ukumela amazwe abo njengoba kade kunekhefu leFifa. Okwenza iChiefs ibambe umoya ngalaba badlali wukuthi kunabadlali abamqoka abangeke babe yingxenye yalo mdlalo ngenxa yamakhadi.
Kubona kubalwa u-Eric Mathoho othole ikhadi elibomvu ngesikhathi iziMpofana ziguqisa i-Orlando Pirates ngo3-2 ngeledlule, uDaniel Akpeyi noWillard Katsande abanamakhadi aphuzi.
UBartlett nguyena obeqhuba iChiefs Reserves iguqiswa yiOrlando Pirates Reserves ngo-10 emdlalweni weMultiChoice Diski Challenge (MDC) ngoMgqibelo ntambama eDobsonville Stadium, eSoweto.
Lo mqeqeshi uchithe izinsuku ezine nesikwati seMDC njengoba u-Arthur Zwane ebematasa kwiBafana Bafana ebibhekene neSudan kowokuhlungela i-Africa Cup of Nations izolo ngeSonto ntambama e-Orlando Stadium, eSoweto.
UBartlett uphinde waqinisa abalandeli beChiefs idolo ngokuthi makhulu amathuba okumuka nesicoco se-Absa Premiership abazihola phambili kuyona.
“Ngithanda ukucacisa ukuthi kubuhlungu ukuhlulwa, kanti kubi kakhulu ukuguqiswa yiPirates.
"Angisitholanga isikhathi esanele sokupholisha laba badlali. Ngijabule ngezinga elikhonjiswe nguNkosingiphile Ngcobo noNjabulo Blom asebeyingxenye yesikimu esikhulu. UBontle Molefe ongunozinti wethu oneminyaka engu-16 ubudala, ugile izimanga kulo mdlalo.
"Lokhu kuyakhombisa ukuthi mukhulu umsebenzi owenziwa kwinkulisa yeChiefs. Vele yiyona ewumgogodla wekilabhu. IChiefs ngiyibona inalo ithuba lokuqukula inkomishi ye-Absa Premiership. Okufanele sikwenze wukuqhubeka nokuqoqa amaphuzu.
"Luselude kakhulu ukhalo ngoba kayikho ikilabhu eyake yagcotshwa njengezingqwele zeligi ngoLwezi (November). Kufanele sisebenze kanzima ukuze siqhubeke nokuvula igebe lamaphuzu kwizimbangi zethu. Nokho-ke kufanele siqale sinqobe inkomishi yeTelkom ukuze abadlali bethu bezokhuthazeka kakhulu emidlalweni yeligi,” kusho uBartlett.
Umdlalo weChiefs Reserves nePirates Reserves bekungowokuvala imidlalo yeDerby Festival, kanti wandulelwe ngoweMamelodi Sundowns Reserves enenebule iSuperSport United Reserves ngo-6-3.
Usuku luvulwe ngomdlalo wamaZulu Reserves aguqise iLamontville Golden Arrows Reserves ngo-4-1.