IBAFANA INQOBE I-SUDAN KUNZIMA
UVIKELE abadlali uMolefi Ntseki ongumqeqeshi weBafana Bafana behlulwa wukuvalela amathuba ngesikhathi behlula iSudan ngo-1-0 kowokuhlungela i-Africa Cup of Nations (Afcon) izolo ngeSonto ntambama e-Orlando Stadium, eSoweto.
Igoli okunqobe ngalo iBafana livalelwe nguLebogang Phiri sekusele kancane kuyiwe ekhefini. IBafana ikhande inqwaba yamathuba kulo mdlalo, kodwa yahluleka yancama ukubhakuzisa inethi.
Lona bekuwumdlalo wesibili weBafana wokuhlungela i-Afcon ezokuba ngonyaka ozayo eCameroon. IBafana iyiqale kabi le midlalo inenebulwa yiGhana ngo-2-0 ekuhambeni kanti iSudan ivule ngokubhudluza iSaoTome Principe ngo-4-0.
UNtseki uthi esiwombeni sesibili kucacile ukuthi abadlali bakhe bese bekhathele ngemuva kokubuya eGhana nokudlala imidlalo emqoka ezinsukwini ezimbalwa.
Uthi kuyamjabulisa ukukhanda amathuba kwezakhe ngoba kukhombisa ukulobizela ukuthola amagoli.
IBafana ibiphoqelekile ukunqoba lo mdlalo ukuzigcina isethubeni lokuzibekisela indawo eCameroon ngemuva kokukhishwa kabuhlungu yiNigeria kwi-Afcon yakulo nyaka ebise-Egypt yize imangaze abaningi ikhipha osokhaya.
Lo mdlalo bekungowesibili osemthethweni kaNtseki onikwe umsebenzi wokulolonga iBafana ngemuva kokwesula kukaStuart Baxter wase
England ozibeke phansi izintambo ngemuva kwe-Afcon.
Nokho-ke uNtseki ulivule kahle ikhasi lakhe kwiBafana njengoba ehlule iMali ngo-2-1 koweNelson Mandela Challenge, engabalwa emidlalweni esekhalendeni leFifa.
UNtseki uthi ukudlala umdlalo wonke ngoLwesine kubakhahlameze kakhulu abanye abadlali bakhe. Uthi lokhu kube ngesinye sezizathu ezenze wayalela uThapelo Morena ukungalokhu eshoshela kakhulu phambili.
UPhiri uqokwe njengomdlali ovelele kulo mdlalo.