UGCINE EGAWULE E-KZN UKHUNE
UKHOMBISE abagadli ukuthi ashaywa kanjani amagoli ngaphandle kwenkundla unozinti weKaizer Chiefs, u-Itumeleng Khune, ezishaya zonke kubo kwesinqandamathe sakhe, uSphelele Makhunga, waseHillcrest, eThekwini, ngoMgqibelo.
Lo nozinti - owaqala ukugqama esikwatini sika-Under 20 saseNingizimu Afrika - yize wayevele esemabhukwini eChiefs - sekuyaziwa ukuthi izintokazi zaKwaZulu-Natal zifana nezimbali kuyena, njengoba kuqale ngokuthi abe sematheni ngokuthandana nosaziwayo ongumethuli wezinhlelo kumabonakude, uMinenhle “Minnie” Dlamini, okuwumlando ukuthi useganele kwaJones.
Waphinda waba nobudlelwano noSbahle Mpisane, oyindodakazi kaMnu Sbu Mpisane ongumnikazi weRoyal Eagles edonsa kanzima kwiGladAfrica, ephakela i-Absa Premiership amakilabhu asevuthiwe.
Imithombo yeLANGA esondelene nalolu daba, isipotshozele ukuthi uKhune uzishaye zonke izinkomo ebezifunwe wumndeni wakwaMakhunga.
“Zizowushaya maduze nje, wukuthi njengamanje akuvumelekile ukuthi siveze okuningi,” kusho umthombo.
Le ntokazi yakwaMakhunga ewuzime ike yaba sematheni ngesikhathi lo nozinti eveza ekhasini lakhe kuTwitter nakwezinye izinkundla zokuxhumana ukuthi yiyona esithathe inhliziyo yakhe.
Ezinkundleni zokuxhumana ngeSonto emini, umfowabo omdala kaSphelele, uDJ Meech, ubhale ekhasini lakhe le-Instagram eyala uKhune, ethi amphathe kahle udadewabo.
“Usekhulile manje udadewethu omncane, izibusiso ziyamlandela, Itumeleng siyakucela umphathe kahle, ngithandazela uthando olunezibusiso. Umphathe kahle, ungangenzi ngiqoqe izikhali zami,” esho ku-Instagram.
USphelele yena akabhalanga okuningi, kodwa ufake isithombe sakhe wathi “Thank you @ Itukhune32”.
Ethintwa yiLANGA uKhune, uthe akazikhulumi izindaba zakhe zangasese.