Unqobe i-IdolsSA
ULuyolo ukhale wemuka nesicoco se-Idols
KUQOPHEKE umlando uLuyolo Yiba eba ngowokuqala ngqa oqhamuka e-Eastern Cape ukunqoba isicoco se-Idols SA ekhonjiswa esiteshini sikamabonakude, iMzansi Magic, izolo ngeSonto eCarnival City, eGoli.
ULuyolo ukhombise ukuba yintandokazi kulo mncintiswano ngesikhathi usungena esigabeni se- top 10. Kowamanqamu ubebhekene nentokazi yaseMlazi, uSnenhlanhla “Sneziey” Msomi, nayo ebikhombisa ukuba yintandokazi kubalandeli balo mncintiswano.
ULuyolo uhlabane ngemiklomelo eyahlukene, okukhona kuyona imoto nemali elinganiselwa ku-R1 million. Abalelwa ku-36 million amavoti angene kuleli sonto kanti esewonke kule sizini awu-186 million. Lokhu kuvezwe nguProverb, ogama lakhe langempela nguTebogo Thekiso, ongumethuli walo mncintiswano. Ngaphambi kokuba kumenyezelwe onqobile, bobabili, uSneziey noLuyolo, baqhulule amanoni abo amasha.
Bashiyelane inkundla nezinye izilomo zabaculi baseNingizimu Afrika okubalwa kubo uSamthing Soweto, uSho Madjozi, uVusi Nova, uDJ Zinhle, uYanga noBoity. Abaphume kwi- top 10 bebekhona njengoba nabo beculile.
Amajaji alo mncintiswano, uRandall Abrahams, u-Unathi Nkayi noSomizi Mhlongo, angene eswenke kudideka umashonisa.
I-Idols yanonyaka ibinezigigaba ezahlukene ezikhulumise abantu ezindaweni ezahlukene, ikakhulukazi ezinkundleni zokuxhumana.
Amawele akwaQwabe, KwaDukuza, uViggy noVirginia - abengabonwa nangalukhalo kowamanqamu izolo - abesematheni ngendlela aphuma ngayo kulo mncintiswano. U-Virginia waphuma ngenxa yokungabi namavoti anele, kanti uViggy yena wahoxa emuva kokuphuma kukadadewabo.
Ngeledlule u-Unathi ube sematheni ezinkundleni zokuxhumana ngemuva kokwenza ihlaya elithi amaXhosa asekhathele wukumela (ngempumelelo) iNingizimu Afrika ngesikhathi kuqhubeka lo mncintiswano kumabonakude.
Abantu abaningi kulezi zinkundla bamgxekile u-Unathi waze waphoqeleka ukuba axolise. Bese kungokwesi-15 lo mncintiswano wenzeka kanti usukhiqize inqwaba yabaculi.