UMNYANGO USULUPHOSA EMPHAKATHINI UKUZWA AMANZI NGOBHOKO UDABA LWE-NHI
ULUPHOSA ebantwini udaba lweNational Health Insurance (NHI) uMnyango wezeMpilo njengoba izolo ngeSonto ubuseXobho ngaphansi kukaMasipala uBuhlebezwe uhambisana noMasipala wesiFunda iHarry Gwala mayelana nalo.
Inhloso bekuwukuzwa amanzi ngobhoko ngemizwa yomphakathi nokuvula inkundla yokuphefumula kwawo ngomthethosivivinywa omayelana neNHI.
Kulo kulo mhlangano - obekukhona kuwona noMnu Jacob Zuma owayengumengameli waseNingizimu Afrika - uNgqongqoshe wezeMpilo, uDkt Zweli Mkhize, ubikele umphakathi ngemihlomulo yalo mshwalense ezotholwa yizakhamizi zaleli zwe.
Unxuse umphakathi ukuba wenze izethulo zawo zokuweseka lo mthethosivivinywa.
Kuzokhumbuleka ukuthi kwaqubuka enkulu impikiswano emuva kokuba uDkt Mkhize ethule lo mthethosivivinywa ePhalamende mhla ka-8 kuNcwaba (August) nonyaka.
Phakathi kwabathintekayo ngokuqala kokusebenza kwalo mshwalense, yizikhwama zemishwalense yokwelapha ezizimele ngokubona ukuthi kuzoncipha amadlelo lapho nazo zidla khona.
Embikweni we-Eye Witness, eyaphuma ezinyangeni ezintathu ezedlule, uMnu Russell Rensburg wase-Uni-versity of the Witwatersrand, wathi nakuba umuhle umqondo wokuba kube nomshwalense walolu hlobo, inkinga wukuthi izakhamizi kazisawethembi ngenxa yokwehluleka wukuphatha kahle izindaba zezwe.