"Simngcwabe ephila" isiphepho kudilika indlu
Ibisiphelile sekusele kufakwe amawindi nezicabha
"SIMNGCWABE ephila owesifazane waseMpolweni, eMgungundlovu, isishingishane esiphenduke undabizekwayo ngeledlele sibhidliza indlu ayakhe eqongelela imali ayisebenza emakhishini.
UNkz Regina Maphumulo (60), ukhala ezimathonsi ngendlu ayakhe kanzima ngoba efuna umndeni wakhe ube nekhaya elifudumele.
Indlu yakhe ibalwa nezinye ezidilike ngesikhathi kunesiphepho ngeledlule kule ndawo, esishiye kulimele abantu ababalelwa ku-18 kwashona uMnu Sphelele Ndlovu noNkz Nonhlanhla Buthelezi.
ILANGA LangeSonto libike kabanzi izolo ngesimo sakule ndawo njengoba abantu besakuthola kunzima ukuqhubeka nempilo emuva kwalesi sishingishane. UNkz Maphumulo, uthi imali ayichithile ngokwakha le ndlu - sekuhlangene neholo lomuntu obemakhela - wu-R200 000.
Uthi sekufana nephupho ukuthi uke waba nendlu abezitshela ukuthi uzodlela kuyona uKhisimusi. Utshele ILANGA ukuthi ubethenga kancane kancane izimpahla zokwakha njengoba ehola u-R1 500 njalo ngenyanga.
“Ngelanga okwenzeke ngalo le nto, bengingekho njengoba ngisebenzela eThekwini. Ngithole ucingo komakhelwane bengitshela ukuthi mangiphuthume ekhaya ngiyobheka indlu yami idilikile. Ngivele ngaphelelwa ngamandla sengibona umonakalo osudalwe yilesi siphepho.
"Ingxenye yendlu yami idilike yonke. Okubuhlungu wukuthi bese kusele ukuba ngifake izicabha namawindi bese siyangena endlini,” kusho yena. Uthi akazi noma uzoluthola yini usizo kuhulumeni. Uthi ubephoqeleka ukusebenza ezindaweni ezahlukene, engasitholi nesikhathi sokuphumula ngoba efuna ukuqeda indlu yakhe, ondle nezingane.
"Angazi nokuthi ngithini. Ngibuhlungu ngendlu yami ebengizitshela ukuthi sengiqedile ukuyakha ngiqongelela imali. Kwesinye isikhathi bengicela kubaqashi bami ukuba bangiboleke imali bese bebamba emholweni wami njalo ngenyanga.
"Isiyonke imali engakhe ngayo, wu-R150 000, bese kuba yimali engango-R50 000 engikhokhele ngayo umakhi. Konke lokhu sekushabalele kuhle kwamazolo ebona ilanga,” kusho yena.